50-ാം വയസ്സിൽ ജീവിതത്തിലേയ്‌ക്കെത്തിയ മാലാഖ; സന്തോഷം പറഞ്ഞ് പ്രഭുദേവ

തങ്ങളുടെ ആദ്യ കൺമണിയെ വരവേറ്റ് പ്രഭുദേവയും ഭാര്യ ഡോക്ടർ ഹിമാനിയും. പെൺകുഞ്ഞാണ് ഇരുവർക്കുമായി പിറന്നത്.

അൻപതാം വയസ്സിൽ സംഭവിച്ച ഈ സന്തോഷം ദി ടൈംസ് ഓഫ് ഇന്ത്യയുമായി താരം സ്ഥിരീകരിച്ചു. "അതെ,സത്യമാണ്. അൻപതാം വയസ്സിൽ ഞാനൊരു അച്ഛനായിരിക്കുന്നു. ഒരുപാട് സന്തോഷവും പൂർണതയും തോന്നുന്നുണ്ട്." തിരക്കുകളെല്ലാം ഒഴുവാക്കി കുടുംബത്തോടൊപ്പം സമയം ചെലവഴിക്കാൻ തീരുമാനിച്ചെന്നും പ്രഭുദേവ പറഞ്ഞു.

ഹിന്ദി, തമിഴ്, തെലുങ്ക് എന്നീ ഭാഷകളിലായി അനവധി ചിത്രങ്ങൾ പ്രഭുദേവ സംവിധാനം ചെയ്തിട്ടുണ്ട്. സൽമാൻ ഖാൻ ചിത്രം 'രാധേയ്' ആണ് പ്രഭുദേവ അവസാനമായി സംവിധാനം ചെയ്ത ചിത്രം. വാണ്ടഡ്, റൗഡി റാതോർ, രാമയ്യ വാസ്തവയ്യ, ആർ രാജ്കുമാർ എന്നിവയാണ് പ്രഭുദേവയുടെ സംവിധാനത്തിൽ ഒരുങ്ങിയ ചിത്രങ്ങൾ. സംവിധാനത്തിൽ മാത്രമല്ല അഭിനയത്തിലും പ്രഭുദേവ തന്റെ സാന്നിധ്യം അറിയിച്ചിട്ടുണ്ട്.

2020 ലാണ് ഡോ ഹിമാനിയെ പ്രഭുദേവ വിവാഹം ചെയ്തത്. ഒൻപത് വർഷത്തെ വിവാഹബന്ധം വേർപ്പെടുത്തിയതിനു ശേഷമായിരുന്നു രണ്ടാം വിവാഹം. ആദ്യ വിവാഹത്തിൽ മൂന്ന് മക്കളാണ് പ്രഭുദേവയ്ക്കുള്ളത്. ഇതിൽ ആദ്യ മകൻ ബ്രെയിൻ ട്യൂമറിനെ തുടർന്ന് 2008 ൽ മരണമടഞ്ഞു. അമ്മയ്ക്കൊപ്പമാണ് മറ്റു രണ്ടു കുട്ടികൾ താമസിക്കുന്നത്.