ആഘോഷങ്ങൾ അങ്ങ് ടർക്കിയിൽ; വിശേഷദിവസം ഇന്ദ്രനൊപ്പം പൂർണിമ

മലയാള സിനിമയുടെ പ്രിയപ്പെട്ട താരദമ്പതികളാണ് പൂർണിമയും ഇന്ദ്രജിത്തും. ഇരുവരുടേയും 20-ാം വിവാഹ വാർഷികമായിരുന്നു ഇന്നലെ. ഒപ്പം പൂർണിമയുടെ നാൽപ്പത്തി നാലാം ജന്മദിനവും. ഈ വിശേഷദിവസം ആഘോഷമാക്കാനായി ഇരുവരും യാത്രതിരിച്ചത് അങ്ങ് ടർക്കിയിലേക്കാണ്.

ആശംസകളറിയിച്ച എല്ലാവർക്കും നന്ദി പറഞ്ഞു കൊണ്ടാണ് പൂർണിമ ടർക്കിയിൽ നിന്നുള്ള ചിത്രങ്ങൾ പങ്കുവച്ചത്.

"വൈകാരികമായും ശാരീരികമായും നിനക്ക് ഇത് എളുപ്പമുള്ള വർഷമായിരുന്നില്ല എന്ന് എനിക്കറിയാം. എന്നാൽ നീയത് കൈകാര്യം ചെയ്ത രീതി, വർഷങ്ങൾകൊണ്ട് എത്ര ശക്തയായ സ്ത്രീയായി നീ വളർന്നുവെന്ന് എന്നെ ബോധ്യപ്പെടുത്തി. എന്റെ നങ്കൂരമായതിന് നന്ദി, എന്റെ കരുത്ത്, നിരുപാധികം എന്നെ സ്നേഹിച്ചതിന് നന്ദി. നിനക്കായി ജന്മദിനാശംസകൾ നേരുന്നു, ഒപ്പം 20-ാം വാർഷികവും ആശംസിക്കുന്നു. ഞാൻ നിന്നെ സ്നേഹിക്കുന്നു," എന്നായിരുന്നു ഇന്ദ്രജിത്തിന്റെ ആശംസ.

2002 ഡിസംബർ 13നായിരുന്നു ഇരുവരുടേയും വിവാഹം. ഇരുവർക്കും രണ്ട് പെൺമക്കളാണ്. പ്രാർഥനയും നക്ഷത്രയും. പ്രാർഥന ഒരു പിന്നണി ഗായിക കൂടിയാണ്.

സിനിമാ താരം, ടെലിവിഷന്‍ അവതാരക എന്നീ നിലകളില്‍ നിന്നും സംരംഭകയായി മാറിയ വ്യക്തിയാണ് പൂര്‍ണിമ ഇന്ദ്രജിത്ത്. 2013ല്‍ പൂര്‍ണിമ സ്ഥാപിച്ച ‘പ്രാണ’ എന്ന സ്ഥാപനം കുറഞ്ഞ നാള്‍കൊണ്ടുതന്നെ ശ്രദ്ധിക്കപ്പെട്ടിരുന്നു. ഒരിടവേളയ്ക്ക് ശേഷം പൂർണിമ അഭിനയത്തിലേക്ക് തിരികെയെത്തിയിരിക്കുകയാണ്. പൂർണിമ അഭിനയിച്ച 'തുറമുഖം' എന്ന ചിത്രം റിലീസ് കാത്തിരിക്കുകയാണ്.