'അമ്മ' താര സംഘടനയ്ക്ക് പുതിയ ഭാരവാഹികൾ; സിദ്ദിഖ് ജനറൽ സെക്രട്ടറി

മലയാള സിനിമാ താര സംഘടനയായ 'അമ്മ'യ്ക്ക് പുതിയ ഭാരവാഹികൾ. പ്രസിഡന്റായി മൂന്നാം തവണയും മോഹൻലാൽ തിരഞ്ഞെടുക്കപ്പെട്ടു. നടൻ സിദ്ദിഖാണ് ജനറൽ സെക്രട്ടറി സ്ഥാനത്തേക്ക് തിരഞ്ഞെടുക്കപ്പെട്ടത്. ഇടവേള ബാബുവിന്റെ പിൻ​ഗാമിയായിട്ടാണ് സിദ്ദിഖ് അമ്മയുടെ നേതൃസ്ഥാനത്തേക്ക് എത്തുന്നത്. സെക്രട്ടറി സ്ഥാനത്തേക്ക് ബാബുരാജാണ് തിരഞ്ഞെടുക്കപ്പെട്ടത്. ജഗദീഷ്, ജയൻ ചേർത്തല എന്നിവരാണ് വൈസ് പ്രസിഡന്റുമാർ.

അമ്മ എക്സിക്യൂട്ടീവ് കമ്മിറ്റി മെമ്പേഴ്‌സായി കലാഭവൻ ഷാജോൺ, സുരാജ് വെഞ്ഞാറമൂട്, ജോയ് മാത്യു,സുരേഷ് കൃഷ്ണ, ടിനി ടോം, അനന്യ, വിനു മോഹൻ, ടോവിനോ തോമസ്, സരയു മോഹൻ, അൻസിബ എന്നിവരെ തിരഞ്ഞെടുത്തു.

കൊച്ചി ഗോകുലം കൺവെൻഷൻ സെന്ററിലാണ് തിരഞ്ഞെടുപ്പ് നടന്നത്. സിദ്ദിഖ്, ഉണ്ണി ശിവപാൽ, കുക്കു പരമേശ്വരൻ എന്നിവർ ജനറൽ സെക്രട്ടറി സ്ഥാനത്തേക്കും, ജഗദീഷ്, ജയൻ ചേർത്തല, മഞ്ജു പിള്ള എന്നിവർ വൈസ് പ്രസിഡന്റ് സ്ഥാനത്തേക്കും മത്സരിച്ചു. ബാബുരാജ്, അനൂപ് ചന്ദ്രൻ എന്നിവരാണ് സെക്രട്ടറി സ്ഥാനത്തേക്ക് മത്സരിച്ചത്.

തിരഞ്ഞെടുപ്പിൽ നാല് വനിത മെമ്പർമാരായിരുന്നു വിജയിക്കേണ്ടിയിരുന്നത്. മൂന്ന് വനിതാ പ്രതിനിധികളാണ് നിലവിൽ വിജയിച്ചിരിക്കുന്നത്. കുക്കു പരമേശ്വരനും മഞ്ജു പിള്ളയും പരാജയപ്പെട്ടു. ഒരു വനിതാ പ്രതിനിധിയെ അടുത്ത എക്സിക്യൂട്ടീവ് യോഗത്തിൽ നോമിനേറ്റ് ചെയ്യും. ഇതിനുള്ള അധികാരം തിരഞ്ഞെടുക്കപ്പെട്ട ജനറൽ ബോഡി നൽകി.

മോഹൻലാലിനെ പ്രസിഡന്റായും, ഉണ്ണി മുകുന്ദനെ ട്രഷററായും നേരത്തെ എതിരില്ലാതെ തിരഞ്ഞെടുത്തിരുന്നു. സിദ്ദിഖ് സ്ഥാനം ഒഴിഞ്ഞതോടെയാണ് ട്രഷറർ സ്ഥാനത്തേയ്ക്ക് ഉണ്ണി മുകുന്ദൻ എത്തിയത്. മൂന്ന് പതിറ്റാണ്ടിലേറെയായി സംഘടനയിൽ വിവിധ ചുമതലകൾ നിർവഹിക്കുന്ന ഇടവേള ബാബു ജനറൽ സെക്രട്ടറി പദവി ഒഴിയുകയാണെന്ന് നേരത്തെ തന്നെ അറിയിച്ചിരുന്നു. 

Read More

• ഏറ്റവും കൂടുതൽ കളക്ഷൻ നേടുന്ന ഇന്ത്യൻ സിനിമ; ചരിത്ര നേട്ടവുമായി കൽക്കി 2898 എഡി
• ഇതിഹാസം, ഇന്ത്യൻ സിനിമ മറ്റൊരു തലത്തിലേക്ക്; കൽക്കിക്ക് അഭിനന്ദനവുമായി രജനികാന്ത്
• ദിലീപേട്ടനും മനോജേട്ടനും അങ്ങനെ പറഞ്ഞ് പേടിപ്പിക്കുമായിരുന്നു: മഞ്ജു വാര്യർ
• കുട്ടിക്കുറുമ്പി ചേച്ചി; ഈ പെൺകുട്ടിയെ മലയാളികൾക്കിഷ്ടമാണ്
• 332 കോടി രൂപയുടെ ആസ്തി, 100 കോടിയുടെ ബംഗ്ലാവ്, നൂറുകണക്കിന് കാഞ്ചീവരം സാരികൾ, ലക്ഷ്വറി വാഹനങ്ങൾ: റാണിയെ പോലെ രേഖയുടെ ലക്ഷ്വറി ജീവിതം
• കണ്ണാടിച്ചില്ലൊത്ത പെണ്ണാളല്ലേ; മീരയുടെ മെഹന്ദി ആഘോഷമാക്കി നസ്രിയയും ആനും സ്രിന്റയും