രാം ചരണിന്റെ മാലാഖയ്ക്കായി സംഗീതം ഒരുക്കി കാല ഭൈരവ

ചൊവ്വാഴ്ച്ച രാവിലെയാണ് തെലുങ്ക് സൂപ്പർതാരം രാം ചരണിനും ഭാര്യ ഉപാസനയ്ക്കും പെൺകുഞ്ഞ് പിറന്നത്. സംഗീത സംവിധായകനും ഗായകനുമായ കാല ഭൈരവ രാമചരണിന്റെ കുഞ്ഞിനായി ഒരു ഗാനം ഒരുക്കിയിരിക്കുകയാണ്. അക്കാദമി പുരസ്കരാം നേടിയ ആർആർആർ ലെ നാട്ടു നാട്ടു എന്ന ഗാനം ആലപിച്ചത് കാല ഭൈരവയായിരുന്നു. സംഗീതജ്ഞന് നന്ദി അറിയിച്ച് ഗാനം രാം ചരൺ തന്റെ സോഷ്യൽ മീഡിയ ഹാൻഡിലുകളിൽ പങ്കുവച്ചു.

"ഞങ്ങൾക്കു വേണ്ടി ഈ ഈണം ഒരുക്കിയതിന് നന്ദി കാല ഭൈരവ. ലോകത്തുള്ള ലക്ഷകണക്കിനു കുട്ടികളിലേക്ക് ഈ മെലഡി സന്തോഷം കൊണ്ടുവരുമെന്ന് ഞങ്ങൾക്ക് ഉറപ്പാണ്," രാം ചരൺ കുറിച്ചു.

പത്ത് വർഷത്തെ കാത്തിരിപ്പിന് ശേഷമാണ് ഇവർക്ക് കുഞ്ഞുണ്ടാകുന്നത്. അടുത്തിടെ, ഹ്യൂമൻസ് ഓഫ് ബോംബെയ്ക്ക് നൽകിയ അഭിമുഖത്തിൽ, വൈകി നടന്ന ഗർഭധാരണത്തെക്കുറിച്ച് ഉപാസന തുറന്ന് പറഞ്ഞിരുന്നു. ‘സമൂഹം ആഗ്രഹിച്ചപ്പോഴല്ല, ഞങ്ങൾ ആഗ്രഹിച്ചപ്പോൾ അമ്മയാകാൻ സമയം തിരഞ്ഞെടുക്കാൻ കഴിഞ്ഞതിൽ അഭിമാനിക്കുന്നു. ഇത് ഏറ്റവും നല്ല സമയമാണെന്ന് ഞാൻ കരുതുന്നു, ഞങ്ങൾ രണ്ടു പേരും ഇപ്പോൾ സാമ്പത്തികമായി സുരക്ഷിതരാണ്.’

‘ഇത് ഞങ്ങളുടെ ഒന്നിച്ചുള്ള തീരുമാനമായിരുന്നു. ദമ്പതികൾ എന്ന നിലയിൽ, ആ കാര്യത്തിൽ കുടുംബത്തിൽ നിന്നോ പുറത്തുള്ളവരിൽ നിന്നോ സമ്മർദ്ദം വരാൻ ഞങ്ങൾ അനുവദിച്ചില്ല.’ അവർ കൂട്ടിച്ചേർത്തു.

എസ് എസ് രാജമൗലിയുടെ ‘ആർആർആർ’ എന്ന ചിത്രത്തിലാണ് രാം ചരൺ ഏറ്റവും ഒടുവിൽ അഭിനയിച്ചത്. ഹോളിവുഡ് അരങ്ങേറ്റത്തിനുള്ള ഒരുക്കത്തിലാണ് താരം ഇപ്പോൾ.