യൂട്യൂബില്‍ ട്രെന്‍ഡിംഗ് ആയി 'ഒടിയനി'ലെ ഗാനം

ആരാധകര്‍ കാത്തിരിക്കുന്ന മോഹന്‍ലാലിന്‍റെ ബ്രഹ്മാണ്ഡ ചിത്രം 'ഒടിയന്‍' ഡിസംബറില്‍ റിലീസിന് ഒരുങ്ങുകയാണ്. അതിന് മുന്നോടിയായി ചിത്രത്തിന്റെ ഓഡിയോ ട്രാക്കിലെ ഒരു ഗാനത്തിന്റെ ലിറിക്ക് വീഡിയോ ഇന്നലെ റിലീസ് ചെയ്തു. 'കൊണ്ടോരാം' എന്ന് തുടങ്ങുന്ന ഗാനത്തിന്റെ വരികള്‍ അടങ്ങുന്ന വീഡിയോയാണ് സോഷ്യല്‍ മീഡിയയിലൂടെ മോഹന്‍ലാല്‍ പങ്കുവച്ചത്. റഫീഖ് അഹമ്മദിന്റെ വരികള്‍ക്ക് എം.ജയചന്ദ്രന്‍ ആണ് ഈണം പകര്‍ന്നിരിക്കുന്നത്.  സുദീപ് കുമാറും ശ്രേയ ഘോഷലും ചേര്‍ന്ന് ആലപിച്ചതാണ് 'കൊണ്ടോരാം' എന്ന ഗാനം.

ഇന്നലെ വൈകിട്ട് നാല് മണിയ്ക്ക് റിലീസ് ചെയ്ത ഗാനം ഒന്നിരുട്ടി വെളുത്തപ്പോഴേക്കും ഔദ്യോഗിക ഹാന്‍ഡിലില്‍ നിന്ന് മാത്രം എട്ടു ലക്ഷം വ്യൂസിലേക്ക് അടുത്ത് കൊണ്ട് യൂട്യൂബില്‍ ട്രെന്‍ഡിംഗ് ആകുന്ന കാഴ്ചയാണ് ഇപ്പോള്‍ കാണാന്‍ കഴിയുന്നത്‌.  ദൃശ്യങ്ങള്‍ ഇല്ലാത്ത, വരികള്‍ മാത്രം ഉള്‍പ്പെട്ടിട്ടുള്ള ഒരു മലയാളം ലിറിക്ക് വീഡിയോ ഇത്തരത്തില്‍ ട്രെന്‍ഡിംഗ് ആകുന്നതു ഇതാദ്യമായാണ് എന്നാണ് ആരാധകരുടെ പക്ഷം.

പാലക്കാട് പ്രദേശത്തെ പഴയകാല നാടന്‍ കഥ പറയുന്ന ചിത്രത്തില്‍ മോഹന്‍ലാല്‍ ഒടിവിദ്യ വശമുള്ള മാണിക്യന്‍ എന്ന കഥാപാത്രമായി എത്തുന്നു. നായിക മഞ്ജു വാര്യര്‍. നടന്‍ പ്രകാശ് രാജും പ്രധാന വേഷത്തില്‍ എത്തുന്നു. ആന്റണി പെരുമ്പാവൂര്‍ ആണ് നിര്‍മ്മാണം. തിരക്കഥ ഹരികൃഷ്ണന്‍, ക്യാമറ ഷാജി.

കഥാപാത്രത്തിന്റെ മൂന്നു ജീവിതാവസ്ഥകളാണ് സിനിമയില്‍ ചിത്രീകരിക്കുന്നത്.  ഇതിനായി മോഹന്‍ലാല്‍ രൂപവ്യതാസങ്ങളും വരുത്തിയിരുന്നു.  വലിയ ബജറ്റില്‍ ഒരുക്കുന്ന ചിത്രത്തിന്റെ ട്രെയിലര്‍ റിലീസ് ചെയ്തതോട് കൂടി ആരാധകര്‍ ആവേശത്തിലാണ്.

Read More: 'ഒടുക്കത്തെ കളി കാണിക്കാന്‍' ഒടിയനെത്തി; ഒടുവിൽ ട്രെയിലര്‍ മോഹന്‍ലാല്‍ തന്നെ റിലീസ് ചെയ്തു

മീശപിരിച്ച്, മുണ്ടു മടക്കിക്കുത്തി നില്‍ക്കുന്ന ലാലേട്ടനെയാണ് നമ്മള്‍ ഹീറോ ആയി കണ്ടിരിക്കുന്നത് എന്നാല്‍, ഒടിയന്‍ അതില്‍ നിന്നും വ്യത്യസ്തമാണെന്ന് ശ്രീകുമാര്‍ മേനോന്‍ പറഞ്ഞു.

"മീശയില്ലാത്ത ലാലേട്ടന്റെ കട്ട ഹീറോയിസമാണ് 'ഒടിയനി'ല്‍ നമ്മള്‍ കാണുക. ലാലേട്ടന്‍ എപ്പോഴൊക്കെ മീശ വടിച്ചിട്ടുണ്ടോ, അപ്പോഴൊക്കെ ചരിത്രം സൃഷ്ടിച്ചിട്ടുണ്ട്. 'ഇരുവര്‍', 'വാനപ്രസ്ഥം', 'രംഗം' ഒക്കെ ഉദാഹരണങ്ങളാണ്. പക്ഷെ അങ്ങനെ വിചാരിച്ചല്ല 'ഒടിയനി'ലെ മേക്ക് ഓവര്‍. 'ഒടിയന്‍' ഒരുപാട് വേഷം മാറുന്ന ആളാണ്. ആ വേഷപ്പകര്‍ച്ചയ്ക്ക് മീശയും താടിയും തടസ്സമാണ്", സംവിധായകന്‍ വ്യക്തമാക്കി.

ഫാന്റസി ത്രില്ലറായി ഒരുങ്ങുന്ന ചിത്രത്തില്‍ പുലിയായും കാളയായും മാന്‍ ആയും എല്ലാം വേഷം മാറാന്‍ കഴിയുന്ന മാന്ത്രിക ശക്തിയുള്ള ഒടിയന്‍ മാണിക്യന്‍ ആയാണ് മോഹന്‍ലാല്‍ എത്തുന്നതെന്നും അദ്ദേഹം പറഞ്ഞു.

Read More : ഒടിയന്‍, മീശവടിച്ച ലാലേട്ടന്റെ കട്ട ഹീറോയിസം: ശ്രീകുമാര്‍ മേനോന്‍