മുഹമ്മദ് കുട്ടി നടന്ന പാതകളിലൂടെ നടൻ മമ്മൂട്ടി; വീഡിയോ

സോഷ്യൽ മീഡിയയിൽ വളരെയധികം സജീവമാണ് മലയാളികൾ പ്രിയപ്പെട്ട താരം മമ്മൂട്ടി. സിനിമാ വിശേഷങ്ങൾ മാത്രമല്ല മമ്മൂട്ടിയെന്ന വ്യക്തിയെ കുറിച്ചറിയാനും ഇപ്പോൾ താരത്തിന്റെ സോഷ്യൽ മീഡിയ പോസ്റ്റുകളിലൂടെ സാധിക്കും. തന്റെ കോളേജ് കാലഘട്ടത്തിലെ ഓർമ്മകൾ ആരാധകരുമായി താരം പങ്കുവയ്ക്കുന്ന വീഡിയോയാണ് ഇപ്പോൾ വൈറലാകുന്നത്.

എറണാകുളം മഹാരാജാസ് കോളേജിലാണ് മമ്മൂട്ടി തന്റെ ഡിഗ്രി കാലഘട്ടം ചെലവിട്ടത്. കോളേജിലേക്ക് ഷൂട്ടിങ്ങിനായെത്തുന്ന വീഡിയോയാണ് താരം പങ്കുവച്ചിരിക്കുന്നത്. കോളേജ് ലൈബ്രറിയിൽ കയറി തന്റെ ചിത്രമുള്ള കോളേജ് മാസികയും ആരാധകരെ കാണിക്കുന്നുണ്ട്.

"എന്നെങ്കിലുമൊരിക്കൽ സിനിമാ ഷൂട്ടിങ്ങിനു ഇവിടെ വരുമെന്ന് കരുതിയതല്ല. വർഷങ്ങൾക്കിപ്പുറം അതു സംഭവിച്ചു. മഹാരാജാസ് കോളേജ് ലൈബ്രറി, സിനിമാനടൻ അല്ലാത്ത മുഹമ്മദ് കുട്ടി കഥകളെയും കഥാപാത്രങ്ങളെയും അടുത്തറിയുകയും സ്വപ്നാടനം ചെയ്യുകയും ചെയ്ത സ്ഥലം" എന്നാണ് താരം വീഡിയോയിൽ പറയുന്നത്. 1969-74 കാലഘട്ടത്തിലെ കോളേജ് മാസികകളിലൊന്നിൽ തന്റെ ചിത്രം അച്ചടിച്ചു വന്നതും ഏറെ കൗതുകത്തോടെ താരം കാണിക്കുന്നുണ്ട്. ഒരു പക്ഷെ തന്റെ ചിത്രം ആദ്യമായി അച്ചടിച്ചു വന്നതും ഇതേ മാസികയിൽ തന്നെയെന്നും താരം ഓർത്തെടുത്തു.

'കണ്ണൂർ സ്ക്വാഡ്' എന്ന പുതിയ ചിത്രത്തിന്റെ ഷൂട്ടിങ്ങിനായാണ് താരം കോളേജിലെത്തിയതെന്നാണ് വ്യക്തമാകുന്നത്. റോബി വർഗീസ് രാജ് ആണ് ചിത്രത്തിന്റെ സംവിധാനം. തന്റെ കൗമാര കാലഘട്ടം ചെലവഴിച്ച കോളേജിൽ നിന്ന് മടങ്ങിയപ്പോൾ സൂപ്പർ ജൂനിയേഴ്സിനൊപ്പം ഒരു സെൽഫിയെടുക്കാനും മമ്മൂട്ടി മറന്നില്ല.