കുഞ്ഞ് ഇസുവിനൊപ്പം റൈഡർ ചാക്കോച്ചൻ; വീഡിയോ

സോഷ്യൽ മീഡിയയിൽ വളരെയധികം സജീവമാണ് നടൻ കുഞ്ചാക്കോ ബോബൻ. മകൻ ഇസഹാഖിനൊപ്പമുള്ള സന്തോഷ നിമിഷങ്ങളെല്ലാം ചാക്കോച്ചൻ പങ്കുവയ്ക്കാറുണ്ട്. ഇപ്പോഴിതാ ഫാദേഴ്സ് ഡേ പ്രമാണിച്ച് ചാക്കോച്ചൻ പങ്കുവച്ച വീഡിയോയാണ് ശ്രദ്ധ നേടുന്നത്.

മകനൊപ്പം സൈക്കിൾ ഓടിച്ച് കളിക്കുകയാണ് ചാക്കോച്ചൻ. ചെറിയ കുട്ടികൾ ഓടിക്കുന്ന മൂന്ന് ചക്രമുള്ള സൈക്കിളിലാണ് താരം. ചാക്കോച്ചൻ സൈക്കിൾ ഓടിക്കുമ്പോൾ അതിനു മുൻപിലായി മകനും പോകുന്നുണ്ട്. 'പ്രിയപ്പെട്ട അച്ഛന്മാരെ, നിങ്ങളുടെ കുട്ടികളുടെ കുട്ടിയാവുക' എന്നാണ് ചാക്കോച്ചൻ വീഡിയോയ്ക്ക് അടികുറിപ്പ് നൽകിയത്. അനവധി രസകരമായ കമന്റുകളാണ് വീഡിയോയ്ക്ക് താഴെ നിറയുന്നത്.

ചാക്കോച്ചൻ: പതിയെ പോടാ… എനിക്ക് ഈ ദേശത്തെ വഴി അറിയില്ല…, ചാക്കോച്ചന് ഇപ്പോഴും കുട്ടികളുടെ മനസ്സാണ് , ഇതിൽ അച്ഛൻ ഇല്ലല്ലോ മൂന്നും കുട്ടികളാണല്ലോ , ഒരു രാജമലി വിടരുന്ന പോലെ…. അതാണ് ഓർമ വന്നത്, അങ്ങഡ് പറപ്പിച്ചു വിട് പാപ , "അപ്പൊ ഇതിലേതാ കുട്ടി… തുടങ്ങിയ കമന്റുകൾ പൊട്ടിച്ചിരി ഉണർത്തുന്നതാണ്.

കുഞ്ചാക്കോ ബോബനെ പോലെ തന്നെ നിറയെ ആരാധകരുണ്ട് മകൻ ഇസഹാക്ക് ബോബനും. 14 വർഷത്തെ കാത്തിരിപ്പിനുശേഷമാണ് കുഞ്ചാക്കോ ബോബനും പ്രിയയ്ക്കും ഒരു കുഞ്ഞ് പിറന്നത്. 2019 ഏപ്രിൽ 16നായിരുന്നു ഇസഹാക്കിന്‍റെ ജനനം. ഇസുക്കുട്ടന്റെ ഫൊട്ടോകൾ ചാക്കോച്ചൻ ഇടയ്ക്കിടെ സോഷ്യൽ മീഡിയയിൽ ഷെയർ ചെയ്യാറുണ്ട്.

പതിനാല് വര്‍ഷത്തെ നീണ്ട കാത്തിരിപ്പിനൊടുവില്‍ കിട്ടിയ കണ്‍മണിയെ ചുറ്റിപ്പറ്റിയാണ് കുഞ്ചാക്കോ ബോബന്റെയും പ്രിയയുടെയും ജീവിതമിപ്പോൾ. മകന്‍ ഇസഹാക്ക് കുഞ്ചാക്കോയുമായി പങ്കിടുന്ന കൊച്ചു കൊച്ചു നിമിഷങ്ങളാണ് ചാക്കോച്ചന്റെ ഏറ്റവും വലിയ സന്തോഷങ്ങള്‍. മകന്‍ ജനിച്ച നിമിഷം മുതല്‍ അവന്റെ മാമോദീസാ ചടങ്ങ് ഉള്‍പ്പെടെ ഓരോ നിമിഷവും ചാക്കോച്ചന്‍ പ്രേക്ഷകരുമായും പങ്കുവയ്ക്കുന്നുണ്ട്. ചാക്കോച്ചന്റെ ലോകം തന്നെ ഇസയ്ക്ക് ചുറ്റുമാണെന്ന് മുൻപൊരു അഭിമുഖത്തിൽ പ്രിയ തന്നെ പറഞ്ഞിട്ടുണ്ട്.