കലൂര്‍ നിന്നിട്ട് ബാംഗ്ലൂര്‍ എന്നോ?; ചാക്കോച്ചനെ ട്രോളി മിഥുന്‍ മാനുവല്‍

സംവിധായകനും നടനും എന്നതിനപ്പുറത്തേക്കുള്ളൊരു സൗഹൃദം പരസ്പരം സൂക്ഷിക്കുന്നവരാണ് കുഞ്ചാക്കോ ബോബനും മിഥുൻ മാനുവൽ തോമസും. കുഞ്ചാക്കോ ബോബന്റെ കരിയറിൽ അടുത്തിടെ ബ്രേക്ക് സമ്മാനിച്ച ചിത്രങ്ങളിൽ ഒന്നായ 'അഞ്ചാം പാതിര'യുടെ സംവിധായകനും മിഥുൻ മാനുവൽ ആയിരുന്നു.

ഇപ്പോഴിതാ, കുഞ്ചാക്കോ ബോബന്റെ ഒരു ഫേസ് ബുക്ക് പോസ്റ്റും അതിന് മിഥുൻ നൽകിയ കമന്റുമാണ് ആരാധകരുടെ ശ്രദ്ധ കവരുന്നത്. കാറിൽ സഞ്ചരിച്ചുകൊണ്ടിരിക്കുന്ന ഒരു വീഡിയോ ആണ് കുഞ്ചാക്കോ ബോബൻ പങ്കുവച്ചിരിക്കുന്നത്. 'ബാംഗ്ലൂർ ഡേയ്സ്' എന്നാണ് ചിത്രത്തിന് ചാക്കോച്ചൻ നൽകിയ ക്യാപ്ഷൻ.

"കലൂർ റോഡിൽ വണ്ടിക്കകത്തു ഇരുന്നു വീഡിയോ ഇട്ടാൽ ബാംഗ്ലൂർ ആകില്ല മിഷ്ടർ..!! അയ്‌ന് മെനക്കെട്ടു ബാംഗ്ലൂർ പോണം," എന്നാണ് വീഡിയോയ്ക്ക് മിഥുൻ നൽകിയ കമന്റ്. കമന്റിനു രസകരമായ പ്രതികരണങ്ങളാണ് ലഭിച്ചുകൊണ്ടിരിക്കുന്നത്.

'അഞ്ചാം പാതിര'യുടെ വിജയത്തിനു പിന്നാലെ മറ്റൊരു ചിത്രത്തിനായി മിഥുനും കുഞ്ചാക്കോ ബോബനും കൈകോർക്കുന്നു എന്നാണ് റിപ്പോർട്ട്. ഇതിന്റെ വിശദവിവരങ്ങൾ ഇരുവരും വ്യക്തമാക്കിയിട്ടില്ല.

കുഞ്ചാക്കോ ബോബന്റെ ജന്മദിനത്തിലും തന്റെ പ്രിയപ്പെട്ട ചാക്കോ ബോയിയ്ക്ക് ആശംസകളുമായി മിഥുൻ എത്തിയിരുന്നു.

Read more: പാട്ടൊരു വഴിയ്ക്കും ചാക്കോച്ചൻ മറ്റൊരു വഴിയ്ക്കും