ഷൂട്ടിംഗ് വല്ലാതെ മിസ്സ് ചെയ്യുന്നു; അമിതാഭ് ബച്ചനൊപ്പമുള്ള ചിത്രങ്ങളുമായി അനിഘ

കോവിഡ് ലോക്ക്ഡൗണിന്റെ പശ്ചാത്തലത്തിൽ സിനിമാഷൂട്ടിംഗുകൾ നിർത്തിവച്ചതോടെ താരങ്ങളെല്ലാം വീടുകളിൽ കഴിയുകയാണ്. ഷൂട്ടിംഗ് ദിനങ്ങൾ വല്ലാതെ മിസ്സ് ചെയ്യുന്നു എന്നു പറയുകയാണ് യുവതാരങ്ങളിൽ ശ്രദ്ധേയയായ അനിഘ. അമിതാഭ് ബച്ചനൊപ്പം അഭിനയിച്ച ഒരു പരസ്യത്തിൽ നിന്നുള്ള ഏതാനും ചിത്രങ്ങളും അനിഘ ഷെയർ ചെയ്തിട്ടുണ്ട്.

ബാലതാരമായി എത്തി മലയാളികളുടെ ഹൃദയം കവർന്ന അഭിനേത്രിയാണ് അനിഘ സുരേന്ദ്രൻ. മലയാളികളുടെ കൺമുന്നിൽ വളർന്ന പെൺകുട്ടിയെന്ന് അനിഘയെ വിശേഷിപ്പിക്കാം.​

‘കഥ തുടരുന്നു’ എന്ന സിനിമയിലൂടെ ബാലതാരമായിട്ടാണ് അനിഘയുടെ സിനിമയിലേക്കുളള അരങ്ങേറ്റം. 2013 ൽ പുറത്തിറങ്ങിയ 'അഞ്ചു സുന്ദരികൾ' എന്ന സിനിമയിലെ കഥാപാത്രമാണ് അനിഘയെ ഏറെ ശ്രദ്ധേയമാക്കിയത്. ഈ ചിത്രത്തിലെ ഗൗരി എന്ന കഥാപാത്രത്തെ അവതരിപ്പിച്ചതിന് 2013ലെ മികച്ച ബാലതാരത്തിനുള്ള കേരള സംസ്ഥാന ചലച്ചിത്ര അവാര്‍ഡ്‌ നേടി. തുടർന്നിങ്ങോട്ട് മലയാളം, തമിഴ് ഭാഷകളിലായി 15 ലധികം സിനിമകളിൽ അനിഘ അഭിനയിച്ചു.

അജിത് നായകനായ 'എന്നെ അറിന്താൽ' സിനിമയിലൂടെയാണ് തമിഴിൽ എത്തിയത്. ഈ സിനിമയിലെ അഭിനയം അനിഘയെ തമിഴ് മക്കളുടെ പ്രിയങ്കരിയാക്കി. 2019 ൽ പുറത്തിറങ്ങിയ 'വിശ്വാസം' സിനിമയിലും അജിത്തിന്റെ മകളുടെ വേഷം ചെയ്‌തത് അനിഘയാണ്.
ലോക്ക്ഡൗൺ കാലത്ത് ഫോട്ടോഷൂട്ടുകളുമായി തിരക്കിലാണ് അനിഘ. തന്റെ വിവിധ ഫോട്ടോഷൂട്ടുകളിൽ നിന്നുള്ള ചിത്രങ്ങൾ അനിഘ ഇൻസ്റ്റഗ്രാമിൽ പങ്കുവച്ചിരുന്നു.

Read more: മണവാട്ടിയെപ്പോലെ അണിഞ്ഞൊരുങ്ങി അനിഘ; ചിത്രങ്ങൾ