നടി അഞ്ജലി നായർ വിവാഹിതയായി

നടി അഞ്ജലി നായർ വിവാഹിതയായി. സഹസംവിധായകൻ അജിത് രാജുവാണ് വരൻ. തന്റെ സോഷ്യൽ മീഡിയ പേജുകളിലൂടെ അജിത് തന്നെയാണ് ഈ സന്തോഷ വിവരം പങ്കുവച്ചത്. അഞ്ജലിക്കൊപ്പമുള്ള ചിത്രവും അജിത് പങ്കുവച്ചിട്ടുണ്ട്.

നിരവധി സിനിമകളിൽ അഞ്ജലി അഭിനയിച്ചിട്ടുണ്ട്. മാനത്തെ വെള്ളിത്തേര് എന്ന സിനിമയിൽ ബാലതാരമായിട്ടായിരുന്നു അഞ്ജലിയുടെ തുടക്കം. തമിഴ് സിനിമയായ നെല്ലിലൂടെയാണ് നായികയായി അരങ്ങേറുന്നത്. സീനിയേഴ്സ് സിനിമയിലൂടെയാണ് മലയാളത്തിലേക്ക് എത്തുന്നത്.

വെനീസിലെ വ്യാപാരി, മാറ്റിനി, അഞ്ച് സുന്ദരികള്‍, പട്ടം പോലെ, എബിസിഡി, മുന്നറിയിപ്പ്, മിലി, കമ്മട്ടിപ്പാടം, ആന്മരിയ കലിപ്പിലാണ്, പുലിമുരുകന്‍, ഒപ്പം, ടേക്ക് ഓഫ്, ദൃശ്യം 2, കാവല്‍ തുടങ്ങിയ നിരവധി സിനിമകളില്‍ അഭിനയിച്ചിട്ടുണ്ട്. മോഹൻലാൽ നായകനായ ആറാട്ട് ആണ് അഞ്ജലിയുടെ ഏറ്റവും പുതിയ സിനിമ. റാം, അവിയല്‍, കൊച്ചാള്‍, തുടങ്ങി നിരവധി സിനിമകള്‍ അഞ്ജലിയുടേതായി അണിയറയിൽ ഒരുങ്ങുന്നുണ്ട്.

അഞ്ജലിയുടെ രണ്ടാം വിവാഹമാണ്. മകൾ ആവണിയും സിനിമയിൽ ബാലതാരമായി സജീവമാണ്.

Read More: വിജയ്‌യുടെ അറബിക് കുത്തു പാട്ടിന് ചുവടുവച്ച് സാമന്ത; വീഡിയോ