തൃശൂര്‍ പിടിക്കാന്‍ തുഷാര്‍ തന്നെ; വയനാട്ടിലും സ്ഥാനാര്‍ഥിയെ പ്രഖ്യാപിച്ചു

കോട്ടയം: തൃശൂരില്‍ തുഷാര്‍ വെള്ളാപ്പള്ളി തന്നെ എന്‍ഡിഎ സ്ഥാനാര്‍ഥിയാകും. ബിഡിജെഎസിന് നല്‍കിയ അഞ്ച് സീറ്റുകളിലും ഇപ്പോള്‍ സ്ഥാനാര്‍ഥികളായി. കഴിഞ്ഞ ദിവസം മൂന്ന് സീറ്റുകളിലേക്കുള്ള സ്ഥാനാര്‍ഥികളെ മാത്രമാണ് പ്രഖ്യാപിച്ചിരുന്നത്. ഇന്ന് മറ്റ് രണ്ട് സ്ഥാനാര്‍ഥികളേയും പ്രഖ്യാപിച്ചു. തൃശൂരില്‍ ബിഡിജെഎസ് അധ്യക്ഷന്‍ തുഷാര്‍ വെള്ളാപ്പള്ളി മത്സരിക്കുമ്പോള്‍ വയനാട്ടില്‍ പൈലി വാദ്യാട്ട് സ്ഥാനാര്‍ഥിയാകും.

Read More: ബിഡിജെഎസ് സ്ഥാനാര്‍ഥികളെ പ്രഖ്യാപിച്ചു; തുഷാര്‍ വെള്ളാപ്പള്ളി മത്സരിക്കും

അതേസമയം, വയനാട്ടില്‍ രാഹുല്‍ ഗാന്ധി സ്ഥാനാര്‍ഥിയാകുകയാണെങ്കില്‍ സീറ്റ് ബിജെപിക്ക് നല്‍കുന്ന കാര്യവും പരിഗണനയിലാണെന്ന് തുഷാര്‍ പറഞ്ഞു. ബിജെപി ഇതുവരെ സീറ്റ് ആവശ്യപ്പെട്ടിട്ടില്ലെന്നും സാഹചര്യം വന്നാല്‍ സീറ്റ് കൈമാറാന്‍ തയ്യാറാണെന്നും അദ്ദേഹം വ്യക്തമാക്കി.

തിരഞ്ഞെടുപ്പില്‍ മത്സരിക്കാന്‍ എസ്എന്‍ഡിപി ഭാരവാഹിത്വം രാജിവയ്ക്കില്ലെന്നാണ് ഇപ്പോള്‍ തുഷാര്‍ പറയുന്നത്. രാജിവയ്ക്കുമെന്ന് ആരോടും പറഞ്ഞിട്ടില്ലെന്നും തുഷാര്‍ പറയുന്നു. എന്നാല്‍, കഴിഞ്ഞ ദിവസം മാധ്യമങ്ങളോട് സംസാരിക്കുമ്പോള്‍ തിരഞ്ഞെടുപ്പില്‍ മത്സരിക്കണമെങ്കില്‍ എസ്എന്‍ഡിപി ഭാരവാഹിത്വം രാജിവയ്ക്കാനും തയ്യാറാണെന്ന് തുഷാര്‍ പറഞ്ഞിരുന്നു.