രാഹുല്‍ ഗാന്ധി വയനാട്ടിലേക്കില്ലെന്ന് സൂചന; തീരുമാനം ഉടൻ

ന്യൂഡല്‍ഹി: കോണ്‍ഗ്രസ് പ്രവര്‍ത്തകരും നേതാക്കളും ആവേശത്തോടെ കാത്തിരുന്ന രാഹുല്‍ ഗാന്ധിയുടെ വരവ് ഉണ്ടായേക്കില്ല. വയനാട് നിന്ന് സ്ഥാനാര്‍ഥിയാകാന്‍ രാഹുല്‍ ഇല്ലെന്നാണ് സൂചന. ഘടകക്ഷികളുടെ സമ്മര്‍ദ്ദം മൂലമാണ് വയനാട് മത്സരിക്കുന്നതില്‍ നിന്ന് രാഹുല്‍ പിന്മാറിയതെന്ന് റിപ്പോര്‍ട്ടുകളുണ്ട്.

രാഹുല്‍ വയനാട്ടില്‍ നിന്ന് മത്സരിക്കരുതെന്ന് ഘടകക്ഷികള്‍ ആവശ്യപ്പെട്ടതായാണ് സൂചന. എന്‍സിപി അധ്യക്ഷന്‍ ശരദ് പവാര്‍ ഇക്കാര്യത്തില്‍ ശക്തമായ സമ്മര്‍ദ്ദം ചെലുത്തിയതായാണ് സൂചന. കേരളത്തില്‍ നിന്ന് രാഹുല്‍ മത്സരിക്കുന്നത് ഗുണം ചെയ്യില്ലെന്നാണ് ശരദ് പവാര്‍ പറയുന്നത്. അതേസമയം, ബിജെപി മുഖ്യ എതിരാളിയായ കര്‍ണാടകത്തില്‍ നിന്ന് രാഹുല്‍ മത്സരിക്കണമെന്ന നിലപാടാണ് ശരദ് പവാറിനുള്ളത്. ഹൈക്കമാന്‍ഡ് നേതാക്കളെ ശരദ് പവാര്‍ ഇക്കാര്യം അറിയിച്ചതായും സൂചനയുണ്ട്.

Read More: ശശി തരൂര്‍: തെരഞ്ഞെടുപ്പ് കളത്തില്‍ നിന്നും വേദിയിലേക്ക് ഒരു ഫ്ലാഷ് ബാക്ക്

അതേസമയം, രാഹുല്‍ മത്സരിക്കുമോ എന്ന കാര്യത്തില്‍ ഇന്ന് അന്തിമ തീരുമാനം ഉണ്ടാകുമെന്നാണ് പ്രതിപക്ഷ നേതാവ് രമേശ് ചെന്നിത്തല പറഞ്ഞത്. രാഹുല്‍ മത്സരിക്കാതിരിക്കാന്‍ ഇടതുപക്ഷ സമ്മര്‍ദ്ദമില്ലെന്നും രമേശ് ചെന്നിത്തല കൂട്ടിച്ചേര്‍ത്തു.

"രാഹുല്‍ജി വയനാട്ടിൽ മത്സരിക്കുമെന്ന് ഞാനൊരിക്കലും പറഞ്ഞിട്ടില്ല. കേരളത്തില്‍ മത്സരിക്കണം എന്ന ആവശ്യം ഉന്നയിക്കുക മാത്രമാണ് ചെയ്തത്. രണ്ടാമതൊരു സീറ്റിൽ മത്സരിക്കും എന്നൊരു സൂചന ഒരു ഘട്ടത്തിലും രാഹുൽജി നൽകിയിട്ടില്ല" - ഉമ്മൻ ചാണ്ടി പറഞ്ഞു. നേരത്തെ രാഹുൽ ഗാന്ധി വയനാട്ടിൽ മത്സരിക്കുമെന്ന് ഏകദേശം ഉറപ്പായ മട്ടിലായിരുന്നു ഉമ്മൻ ചാണ്ടി പ്രതികരിച്ചിരുന്നത്. എന്നാൽ, ദിവസങ്ങൾക്കിപ്പുറം വാക്ക് മാറിയത് അണികളെ ഒന്നടങ്കം ആശങ്കയിലാഴ്ത്തുന്നു.

രാഹുൽ ഗാന്ധിയുടെ സ്ഥാനാർഥിത്വം വെെകുന്നതിൽ യുഡിഎഫ് ഘടകക്ഷികൾ അതൃപ്തി അറിയിച്ചു. തീരുമാനം വെെകുന്നത് വിജയത്തെ ബാധിക്കുമെന്നാണ് ഘടകക്ഷികളുടെ അഭിപ്രായം. തീരുമാനം ഇന്ന് തന്നെ വേണമെന്ന് മുസ്ലീം ലീഗ് നേതൃത്വം എഐസിസിയോട് ആവശ്യപ്പെട്ടതായാണ് സൂചന.

രാഹുലിന്റെ സ്ഥാനാർഥിത്വം വെെകുന്നത് നല്ല സൂചനയല്ലെന്നാണ് വയനാട് ഡിസിസിയുടെയും അഭിപ്രായം. പ്രചാരണ പരിപാടികൾ നടക്കാത്തത് തിരഞ്ഞെടുപ്പ് വിജയത്തെ ബാധിക്കുമെന്നാണ് ജില്ലാ നേതൃത്വവും പറയുന്നത്. രാഹുൽ വരുമെന്നാണ് പ്രതീക്ഷയെന്ന് വയനാട് സ്ഥാനാർഥിയായി ആദ്യം തീരുമാനിച്ചിരുന്ന ടി. സിദ്ദിഖ് പറഞ്ഞു.