Kerala Weather Report 2020 April 06 Trivandrum Kozhikode Kochi-നാളെ കേരളത്തിലെ മുഴുവൻ ജില്ലകളിലും നേരിയ മഴ

Kerala Weather: നാളെ കേരളത്തിലെ മുഴുവൻ ജില്ലകളിലും നേരിയ മഴ

Kerala Weather: വരും ദിവസങ്ങളിലും കേരളത്തിലെ ചിലയിടങ്ങളിൽ മഴ ലഭിക്കുമെന്ന് കാലാവസ്ഥ വകുപ്പ് പറയുന്നു

Updated: April 6, 2020 17:55 IST

Kerala Weather: തിരുവനന്തപുരം: കേരളത്തിൽ നിരവധി ഇടങ്ങളിൽ ഇന്ന് മഴ ലഭിച്ചു. ആലപ്പുഴ, കോഴിക്കോട്, തിരുവനന്തപുരം, കോട്ടയം, ഇടുക്കി, വയനാട്, എറണാകുളം, കൊല്ലം, തൃശൂർ, മലപ്പുറം ജില്ലകളിലെ ചിലയിടങ്ങളിൽ മഴ പെയ്തു. ആലപ്പുഴയിലെ മാങ്കൊമ്പിലും കോഴിക്കോട് ജില്ലയിലെ കൊയിലാണ്ടിയിലുമാണ് ഇന്നു ഏറ്റവും കൂടുതൽ മഴ ലഭിച്ചത്, 6 സെന്റിമീറ്റർ വീതം.

വരും ദിവസങ്ങളിലും കേരളത്തിലെ ചിലയിടങ്ങളിൽ മഴ ലഭിക്കുമെന്ന് കാലാവസ്ഥ വകുപ്പ് പറയുന്നു. ഏപ്രിൽ 10 വരെ മഴ തുടരുമെന്നാണ് കാലാവസ്ഥ റിപ്പോർട്ട്. അടുത്ത 24 മണിക്കൂറിനിടയിൽ കേരളത്തിൽ ഒന്നോ രണ്ടോയിടങ്ങളിൽ 7-11 സെന്റിമീറ്റർ വരെ ശക്തമായ മഴ ലഭിച്ചേക്കും.

നാളെയും മറ്റന്നാളും കേരളത്തിലെ മുഴുവൻ ജില്ലകളിലും നേരിയ മഴ ലഭിച്ചേക്കും. ഇടിമിന്നൽ മുന്നറിയിപ്പും കാലാവസ്ഥ വകുപ്പ് നൽകിയിട്ടുണ്ട്. മണിക്കൂറിൽ 30-40 കിലോമീറ്റർ വേഗതയിൽ ശക്തമായ കാറ്റും വീശിയടിക്കാൻ സാധ്യതയുണ്ട്. മത്സ്യത്തൊഴിലാളികൾ കടലിൽ പോകരുത്.

അതേസമയം, കഴിഞ്ഞ 24 മണിക്കൂറിനിടയിൽ കേരളത്തിൽ താപനിലയിൽ കാര്യമായ മാറ്റമില്ല. ആലപ്പുഴ, കണ്ണൂർ, കോഴിക്കോട്, കോട്ടയം, പാലക്കാട് ജില്ലകളിൽ താപനില ഉയർന്ന നിലയിലായിരുന്നു. ഇന്നു പാലക്കാടാണ് ഏറ്റവും കൂടുതൽ ചൂട് രേഖപ്പെടുത്തിയത്, 39 ഡിഗ്രി സെൽഷ്യസ്.