Kerala weather meteorological department report on 2019 may 31 Thiruvananthapuram and kochi-കേരളത്തിൽ ഇന്നു ശക്തമായ മഴയ്ക്ക് സാധ്യത, കൊല്ലം, എറണാകുളം ജില്ലകളിൽ യെല്ലോ അലർട്ട്

Kerala Weather: കേരളത്തിൽ ഇന്നു ശക്തമായ മഴയ്ക്ക് സാധ്യത, കൊല്ലം, എറണാകുളം ജില്ലകളിൽ യെല്ലോ അലർട്ട്

Kerala Weather: മേയ് 31 മുതൽ ജൂൺ 4 വരെയുളള 5 ദിവസങ്ങളിൽ കേരളത്തിലും ലക്ഷദ്വീപിലും ഒറ്റപ്പെട്ട ഇടങ്ങളിൽ ഇടിമിന്നലോടുകൂടിയ മഴയ്ക്ക് സാധ്യതയുണ്ട്

Written by WebDesk

May 31, 2019 15:47 IST

Kerala Weather: തിരുവനന്തപുരം: കേരളത്തിൽ ഒറ്റപ്പെട്ട ഇടങ്ങളിൽ മഴ. ലക്ഷദ്വീപിൽ വരണ്ട കാലാവസ്ഥയാണ്. തിരുവനന്തപുരം ജില്ലയിലെ വർക്കല, ആലപ്പുഴ ജില്ലയിലെ കായംകുളം, മലപ്പുറം ജില്ലയിലെ നിലമ്പൂർ എന്നിവിടങ്ങളിൽ 3 സെന്റിമീറ്റർ വീതവും കോട്ടയം ജില്ലയിലെ വൈക്കത്ത് 1 സെന്റിമീറ്ററും മഴ ലഭിച്ചു. ഇന്നു കേരളത്തിൽ ശക്തമായ മഴയ്ക്ക് സാധ്യതയുണ്ടെന്നാണ് കാലാവസ്ഥ നിരീക്ഷണ കേന്ദ്രത്തിന്റെ റിപ്പോർട്ട്. കൊല്ലം, എറണാകുളം ജില്ലകളിൽ യെല്ലോ അലർട്ട് പ്രഖ്യാപിച്ചിട്ടുണ്ട്.

അടുത്ത 24 മണിക്കൂറിനുളളിൽ കേരളത്തിൽ താപനിലയിൽ കാര്യമായ മാറ്റം ഉണ്ടാകില്ല. ആലപ്പുഴ, കണ്ണൂർ, കോട്ടയം, കോഴിക്കോട്, കൊല്ലം, മലപ്പുറം, എറണാകുളം, പാലക്കാട്, തിരുവനന്തപുരം ജില്ലകളിൽ താപനില ഉയർന്നു തന്നെയായിരിക്കും. കേരളത്തിൽ മറ്റു ജില്ലകളിൽ താപനില സാധാരണ നിലയിലായിരിക്കും. ഇന്നു ഏറ്റവും കൂടുതൽ ചൂട് രേഖപ്പെടുത്തിയത് ആലപ്പുഴ, കോട്ടയം, പാലക്കാട് ജില്ലകളിലാണ്, 36 ഡിഗ്രി സെൽഷ്യസ്.

മേയ് 31 മുതൽ ജൂൺ 4 വരെയുളള 5 ദിവസങ്ങളിൽ കേരളത്തിലും ലക്ഷദ്വീപിലും ഒറ്റപ്പെട്ട ഇടങ്ങളിൽ ഇടിമിന്നലോടുകൂടിയ മഴയ്ക്ക് സാധ്യതയുണ്ട്. മേയ് 31 ന് കേരളത്തിൽ ശക്തമായ മഴ പെയ്യുമെന്നാണ് കാലാവസ്ഥാ മുന്നറിയിപ്പ്. ജൂൺ ഒന്നിന് കേരളത്തിലെ ചില ഇടങ്ങളിൽ 7 മുതൽ 11 സെന്റിമീറ്റർവരെ മഴ ലഭിച്ചേക്കും.

ജൂൺ 2 വരെ തിരുവനന്തപുരം നഗരത്തിലും സമീപ പ്രദേശങ്ങളിലും ഭാഗികമായി മേഘാവൃതമായ ആകാശമായിരിക്കും. ചില ഇടങ്ങളിൽ ഇടിമിന്നലോടു കൂടിയ മഴയ്ക്ക് സാധ്യതയുണ്ട്. ഈ ദിവസങ്ങളിലെ ഉയർന്ന താപനില 33 ഡിഗ്രി സെൽഷ്യസ് ആയിരിക്കും. മത്സ്യത്തൊഴിലാളികൾക്ക് ജാഗ്രതാ മുന്നറിയിപ്പൊന്നും ഇല്ല.