Kerala weather meteorological department report on 2019 may 09 Thiruvananthapuram and kochi: കേരളത്തിൽ ഒറ്റപ്പെട്ട ഇടങ്ങളിൽ മഴയ്ക്ക് സാധ്യത, കണ്ണൂരിൽ ചൂടിന് കുറവുണ്ടാകും

Kerala Weather: കേരളത്തിൽ ഒറ്റപ്പെട്ട ഇടങ്ങളിൽ മഴയ്ക്ക് സാധ്യത, കണ്ണൂരിൽ ചൂടിന് കുറവുണ്ടാകും

Kerala Weather: മേയ് 12, 13 തീയതികളിൽ കേരളത്തിൽ ശക്തമായ മഴയ്ക്ക് സാധ്യതയെന്നാണ് കാലാവസ്ഥ മുന്നറിയിപ്പ്

Written by WebDesk

Updated: May 9, 2019 16:32 IST

Kerala Weather: തിരുവനന്തപുരം: കേരളത്തിൽ ഒറ്റപ്പെട്ട ഇടങ്ങളിൽ മഴയ്ക്ക് സാധ്യതയെന്ന് കാലാവസ്ഥ നിരീക്ഷണ കേന്ദ്രത്തിന്റെ റിപ്പോർട്ട്. അതേസമയം, ലക്ഷദ്വീപിൽ വരണ്ട കാലാവസ്ഥ തുടരും. കണ്ണൂരിലെ തളിപ്പറമ്പിലും വയനാട്ടിലെ അമ്പലവയലിലും ഒരു സെന്റിമീറ്റർ വീതം മഴ ലഭിച്ചു. കണ്ണൂരിൽ പരമാവധി ചൂട് കുറവായിരിക്കും. ആലപ്പുഴയിലും ഉയർന്ന താലനില ആയിരിക്കും. മറ്റു ജില്ലകളിൽ താപനില സാധാരണ നിലയിലായിരിക്കും. ഇന്നു ആലപ്പുഴയിലാണ് ഏറ്റവും കൂടുതൽ ചൂട് രേഖപ്പെടുത്തിയത്, 36 ഡിഗ്രി സെൽഷ്യസ്.

മേയ് 9 മുതൽ 13 വരെയുളള 5 ദിവസങ്ങളിൽ കേരളത്തിലെ ചിലയിടങ്ങളിൽ ഇടിമിന്നലോടുകൂടിയ മഴയ്ക്ക് സാധ്യതയുണ്ട്. അതേസമയം, ലക്ഷദ്വീപിൽ മേയ് 9, 10 തീയതികളിൽ വരണ്ട കാലാവസ്ഥയായിരിക്കും. മേയ് 11, 12, 13 തീയതികളിൽ ലക്ഷദ്വീപിന്റെ ചിലയിടങ്ങളിൽ ഇടിമിന്നലോടു കൂടിയ മഴയ്ക്ക് സാധ്യതയുണ്ട്. മേയ് 12, 13 തീയതികളിൽ കേരളത്തിൽ ശക്തമായ മഴയ്ക്ക് സാധ്യതയെന്നാണ് കാലാവസ്ഥ മുന്നറിയിപ്പ്. ഈ ദിവസങ്ങളിൽ 7 മുതൽ 11 സെന്റീമീറ്റർവരെ മഴ ലഭിച്ചേക്കും. മേയ് 11 ന് കാലാവസ്ഥ മുന്നറിയിപ്പ് ഇല്ല.

മേയ് 9, 10 തീയതികളിൽ കടലിൽ പോകുന്നവർ ജാഗ്രത പുലർത്തണം. ശക്തമായ തിരമാലകൾ ഉയർന്നു പൊങ്ങാൻ സാധ്യതയുളളതിനാൽ കേരള, കർണാടക തീരത്തുളള മത്സ്യത്തൊഴിലാളികൾ അടുത്ത 48 മണിക്കൂർ കടലിൽ പോകുന്നത് ഒഴിവാക്കണം. തമിഴ്നാട്, പുതുച്ചേരി തീരങ്ങളിൽ ശക്തമായ കാറ്റിന് സാധ്യതയുണ്ട്. മണിക്കൂറിൽ 35-45 കിലോമീറ്റർ വേഗതയിൽ കാറ്റ് വീശിയടിക്കാൻ സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം പറയുന്നു.

മേയ് 11 വരെ തിരുവനന്തപുരം നഗരത്തിലും സമീപ പ്രദേശങ്ങളിലും ഭാഗികമായി മേഘാവൃതമായ ആകാശമായിരിക്കും. ചില ഇടങ്ങളിൽ ഇടിമിന്നലോടു കൂടിയ മഴയ്ക്ക് സാധ്യതയുണ്ട്. ഈ ദിവസങ്ങളിലെ ഉയർന്ന താപനില 34 ഡിഗ്രി സെൽഷ്യസ് ആയിരിക്കും.