Kerala Weather: കാലവർഷത്തിന് പിന്നാലെ ന്യൂനമര്‍ദ്ദവും; സംസ്ഥാനത്ത് പലയിടങ്ങളിലും ശക്തമായ മഴ

അടുത്ത 5 ദിവസങ്ങളിലും കേരളത്തിൽ ശക്തമായ മഴ പെയ്യുമെന്നാണ് കാലാവസ്ഥാ വകുപ്പിന്റെ മുന്നറിയിപ്പ്

Written by WebDesk

June 9, 2019 19:56 IST

Kerala Weather: കാലവർഷത്തിന് പിന്നാലെ ന്യൂനമര്‍ദ്ദവും; സംസ്ഥാനത്ത് പലയിടങ്ങളിലും ശക്തമായ മഴ

Kerala Weather: തിരുവനന്തപുരം: തെക്ക് – പടിഞ്ഞാറൻ മൺസൂൺ സംസ്ഥാനത്ത് ദുർബലമാണെങ്കിലും കേരളത്തിൽ വിവിധ ഇടങ്ങളിൽ മഴ ലഭിച്ചു. ലക്ഷ്വദ്വീപിന്റെ പലഭാഗങ്ങളിലും മഴ ലഭിച്ചു. ആലപ്പുഴയിൽ 7 സെന്റിമീറ്ററും, ചേർത്തല, മാൻകോമ്പു (ആലപ്പുഴ) എന്നിവിടങ്ങളിൽ 4 സെന്റിമീറ്ററും മഴ ലഭിച്ചു. തിരുവനന്തപുരം സിറ്റി, വർക്കല, നെയ്യറ്റിൻകര, ചേർത്തല എന്നിവിടങ്ങളിൽ 4 സെന്റിമീറ്ററും, കൊല്ലം വൈക്കം, മൂന്നാർ, പീരുമേട് എന്നിവിടങ്ങളിൽ 3 സെന്റിമീറ്റർ വീതവും മഴ ലഭിച്ചു.

കണ്ണൂർ ജില്ലയിൽ ചൂട് താഴ്‌ന്ന നിലയിലാണ്. പാലക്കാട്, ആലപ്പുഴ, കോട്ടയം, കോഴിക്കോട്, കണ്ണൂർ, മലപ്പുറം, എറണാകുളം, കൊല്ലം ജില്ലകളിൽ താപനില ഉയർന്ന നിലയിലാണ്. മറ്റു ജില്ലകളിൽ താപനില സാധാരണ നിലയിലാണ്. ഇന്നു ഏറ്റവും കൂടുതൽ ചൂട് രേഖപ്പെടുത്തിയത് പാലക്കാടാണ്, 37 ഡിഗ്രി സെൽഷ്യസ്.

അതേസമയം സംസ്ഥാനത്ത് കാലവര്‍ഷം എത്തിയതിന് പിന്നാലെ അറബിക്കടലില്‍ ന്യൂനമര്‍ദ്ദം രൂപം കൊണ്ടു. അറബിക്കടലിന്റെ തെക്കുകിഴക്ക് ഭാഗത്താണ് ന്യൂനമര്‍ദ്ദം രൂപപ്പെട്ടത്. ഇത് അടുത്ത 48 മണിക്കൂറിനുള്ളില്‍ അതിതീവ്ര, തീവ്ര ന്യൂനമര്‍ദ്ദമാകമെന്നാണ് കാലാവസ്ഥാ നിരീക്ഷണ കേന്ദ്രം വിലയിരുത്തുന്നത്.

Also Read: സംസ്ഥാനത്ത് മഴ കനക്കും, ഏഴ് ജില്ലകളില്‍ യെല്ലോ അലര്‍ട്ട്

ജൂൺ 9 മുതൽ ജൂൺ 13 വരെയുളള ദിവസങ്ങളിൽ കേരളത്തിലും ലക്ഷദ്വീപിലും ഇടിമിന്നലോടുകൂടിയ മഴയ്ക്ക് സാധ്യതയുണ്ട്. ഈ 5 ദിവസങ്ങളിലും കേരളത്തിൽ ശക്തമായ മഴ പെയ്യുമെന്നാണ് കാലാവസ്ഥാ വകുപ്പിന്റെ മുന്നറിയിപ്പ്. ചില ദിവസങ്ങളിൽ 12 മുതൽ 20 സെന്റിമീറ്റർവരെ മഴ ലഭിച്ചേക്കും. ശക്തമായ കാറ്റ് വീശിയടിക്കാൻ സാധ്യതയുളളതിനാൽ മത്സ്യത്തൊഴിലാളികൾ ജാഗ്രത പാലിക്കണം. ജൂൺ 9, 10, 11 തീയതികളിൽ മണിക്കൂറിൽ 35-45 കിലോമീറ്റർ വേഗതയിൽ കേരള തീരത്ത് കാറ്റ് വീശിയടിക്കാൻ സാധ്യതയുളളതിനാൽ മത്സ്യത്തൊഴിലാളികൾ കടലിൽ പോകരുത്.

ജൂൺ 10 വരെ തിരുവനന്തപുരം നഗരത്തിലും സമീപ പ്രദേശങ്ങളിലും ഭാഗികമായി മേഘാവൃതമായ ആകാശമായിരിക്കും. ചില ഇടങ്ങളിൽ ഇടിമിന്നലോടു കൂടിയ മഴയ്ക്ക് സാധ്യതയുണ്ട്. ഈ ദിവസങ്ങളിലെ ഉയർന്ന താപനില 32 ഡിഗ്രി സെൽഷ്യസ് ആയിരിക്കും.