'പാഡ്മാന്‍'; ഈ വിഡിയോ പറയും അരുണാചലം മുരുഗാനന്ദന്‍ ആരാണെന്ന്

അക്ഷയ് കുമാറിന്റെ 'പാഡ്മാന്‍' എന്ന ചിത്രത്തിലെ 'ആജ് സേ തേരി' ഇറങ്ങി ദിവസങ്ങള്‍ക്കകം സംഗീത പ്രേമികളുടെ പ്ലേ ലിസ്റ്റില്‍ ഇടം പിടിച്ച പാട്ടാണ്. കൗസിര്‍ മുനീറിന്റെ വരികള്‍ക്ക് അമിത് ത്രിവേദിയാണ് സംഗീതം നല്‍കിയിരിക്കുന്നത്. ഈ പ്രണയഗാനത്തിന്റെ മേക്കിങ് വിഡിയോ ആണ് ഇപ്പോള്‍ പുറത്തു വന്നിരിക്കുന്നത്.

ഇതൊരു സാധാരണ മനുഷ്യന്റെ അസാധാരണമായ കഥയാണ്. ഗാനരംഗങ്ങള്‍ പോലും അതിന് തെളിവാണ്. ആ മനുഷ്യന്റെ വ്യക്തിത്വത്തെ വെളിപ്പെടുത്തുന്നതാണ് ഇതിലെ ഓരോ രംഗങ്ങളും. തന്റെ ഭാര്യയെ ഏറ്റവുമധികം സന്തോഷിപ്പിക്കാന്‍ ശ്രമിക്കുന്ന അയാള്‍ മറ്റു പുരുഷന്മാരോടും പറയുന്നത് സ്വന്തം ഭാര്യമാരെ സന്തോഷിപ്പിക്കാനാണ്.

സ്ത്രീകളുടെ ആരോഗ്യവും ആര്‍ത്തവവും വിഷയമാകുന്ന സിനിമ സംവിധാനം ചെയ്യുന്നത് ആര്‍. ബല്‍കിയാണ്. സാനിറ്ററി നാപ്കിനുകള്‍ നിര്‍മിക്കുന്ന കോയമ്പത്തൂരിലെ അരുണാചലം മുരുഗാനന്ദന്റെ ജീവിതത്തെ ആസ്പദമാക്കിയാണ് ചിത്രം ഒരുക്കുന്നത്. സോനം കപൂറും രാധികാ ആപ്തയുമാണ് ചിത്രത്തിലെ നായികമാരായി എത്തുന്നത്.