ചിരിപ്പിക്കാൻ അമിതാഭും ഋഷി കപൂറും എത്തുന്നു; 102 നോട്ട് ഔട്ട് ട്രെയിലർ

അമിതാഭ് ബച്ചന്‍, ഋഷി കപൂര്‍ എന്നിവര്‍ പ്രധാന വേഷത്തില്‍ എത്തുന്ന 102 നോട്ട് ഔട്ട് എന്ന ചിത്രത്തിന്‍റെ ട്രെയിലർ പുറത്തിറങ്ങി. കോമഡിയ്ക്കു പ്രാധാന്യം നല്‍കി ഒരുക്കുന്ന ചിത്രത്തില്‍ അമിതാഭ് ബച്ചന്‍ 102 വയസ്സുള്ള കഥാപാത്രമായാണ് എത്തുന്നത്.

ബച്ചന്‍റെ മകനായാണ് ഋഷി കപൂര്‍ വേഷമിടുന്നത്. അച്ഛനും മകനും തമ്മിലുളള ആത്മ ബന്ധമാണ് ചിത്രത്തിന്റെ ഇതിവൃത്തം. ഒരു ഗുജറാത്തി നാടകത്തെ ആസ്പദമാക്കിയാണ് ചിത്രം ഒരുക്കിയിരിക്കുന്നത്. 27 വര്‍ഷത്തിനു ശേഷമാണ് ഇരുവരും സ്‌ക്രീനില്‍ ഒരുമിച്ച് എത്തുന്നത് എന്നതും ഈ ചിത്രത്തിന്‍റെ പ്രത്യേകതയാണ്.​ ഇരുവരും ഒന്നിച്ച കൂലി, കഭി കഭി, അജൂബ, അമര്‍ അക്ബര്‍ അന്തോണി എന്നീ ചിത്രങ്ങളൊക്കെ സൂപ്പര്‍ഹിറ്റുകളായിരുന്നു.

ഉമേഷ് ശുക്ല സംവിധാനം ചെയ്യുന്ന ചിത്രം നിര്‍മ്മിക്കുന്നത് ഭൂഷണ്‍ കുമാറും, കൃഷന്‍ കുമാറും ചേര്‍ന്നാണ്‌. മെയ് 4 ന് ചിത്രം റിലീസ് ചെയ്യും.