വിജയദശമി ദിനത്തിൽ ആദ്യാക്ഷരം കുറിച്ച് അറിവിന്റെ ലോകത്തേക്ക് നില: ചിത്രങ്ങളുമായി പേളി

വിജയദശമി നാളില്‍ ആദ്യക്ഷരം കുറിച്ച് കുരുന്നുകള്‍ അറിവിന്റെ വെളിച്ചത്തിലേക്ക് പിച്ചവെക്കുകയാണ് കുരുന്നുകൾ. മകൾ നിലയും വിദ്യാരംഭം കുറിച്ചതിന്റെ സന്തോഷം പങ്കിടുകയാണ് നടിയും അവതാരകയുമായ പേളി മാണി.

"അക്ഷരം തൊട്ട്, അറിവിന്റെ ആകാശത്തിലേക്ക്. അറിവിന്‍റെ ലോകത്തേയ്ക്ക് ആദ്യ ചുവട് വെയ്ക്കുന്ന എല്ലാ കുരുന്നുകള്‍ക്കും ഹൃദയം നിറഞ്ഞ ഒരായിരം വിജയ ദശമി ആശംസകള്‍ നേരുന്നു," എന്നാണ് നിലയുടെ വിദ്യാരംഭ ചിത്രങ്ങൾ ഷെയർ ചെയ്ത് പേളി കുറിച്ചത്. പേളിയുടെ പിതാവ് മാണി പോളാണ് നിലയ്ക്ക് വിദ്യാരംഭം കുറിച്ചത്.

അവതാരക, നടി എന്നീ നിലകളില്‍ ശ്രദ്ധ നേടിയ താരമാണ് പേളി മാണി. ബിഗ് ബോസ് ഒന്നാം സീസണില്‍ മത്സരാര്‍ത്ഥികളായി വന്ന് പ്രണയത്തിലായ പേളിയും ശ്രീനിഷും 2019 ലാണ് വിവാഹിതരായത്. 2021 മാര്‍ച്ചിലാണ് മകള്‍ നില ജനിച്ചത്. രണ്ടാമത്തെ കുഞ്ഞിനെ കാത്തിരിക്കുകയാണ് പേളിയും ശ്രീനിഷും ഇപ്പോൾ.

സോഷ്യല്‍ മീഡിയയിലൂടെ വലിയ ആരാധക വൃന്ദത്തെ സ്വന്തമാക്കിയ പേളിയ്ക്കു സ്വന്തമായൊരു യൂട്യൂബ് ചാനലുമുണ്ട്. പേളിയേയും ഭർത്താവ് ശ്രീനിഷിനെയും പോലെ തന്നെ ആരാധകരുടെ പ്രിയങ്കരിയാണ് മകൾ നിലയും. പേളിയുടെ ചിത്രങ്ങളിലൂടെയും വ്ളോഗുകളിലൂടെയും നിലയുടെ വിശേഷങ്ങൾ ആരാധകരിലേക്ക് എത്താറുണ്ട്.