Bigg Boss Malayalam Season 5: മകളെ ഓർത്ത് വേവലാതിപ്പെട്ട ആ അച്ഛനെ കാണാൻ അവളെത്തി; ബിഗ് ബോസ് വീട്ടിൽ നാടകീയ മുഹൂർത്തങ്ങൾ

Bigg Boss Malayalam Season 5: തീർത്തും നാടകീയമായ രംഗങ്ങൾക്ക് സാക്ഷിയായിരിക്കുകയാണ് ബിഗ് ബോസ് മലയാളം സീസൺ 5. ബിഗ് ബോസ് വീട്ടിൽ ഈ ആഴ്ച ഫാമിലി വീക്ക് ആണ്. മത്സരാർത്ഥികളിൽ ചിലരുടെ കുടുംബാംഗങ്ങൾ ഈ ആഴ്ച വീടിനകത്തേക്ക് പ്രവേശിക്കുകയാണ്. മത്സരാർത്ഥികളെ സംബന്ധിച്ച് തീർത്തും അപ്രതീക്ഷിതമായ എൻട്രിയായിരിക്കും ഇതെന്ന് തീർച്ച. ഒരിടവേളയ്ക്ക് ശേഷം പ്രിയപ്പെട്ടവരെ നേരിൽ കാണുമ്പോൾ അത് വൈകാരികമായി മത്സരാർത്ഥികളിൽ ഉണ്ടാക്കുന്ന ഇംപാക്റ്റും ചെറുതല്ല.

നടൻ ഷിജുവിന്റെ ഭാര്യയും മകളുമാണ് ഇപ്പോൾ വീടിനകത്തേക്ക് പ്രവേശിച്ചിരിക്കുന്നത്. കഴിഞ്ഞ ഒരാഴ്ചയോളമായി കുടുംബത്തെ കുറിച്ചോർത്ത് വളരെ അസ്വസ്ഥനാണ് ഷിജു. ഫാദേഴ്സ് ഡേയിൽ മകളുടെ ആശംസ പ്രതീക്ഷിച്ചിരിക്കുന്ന ഷിജുവിന് മകളുടെ ഭാഗത്തു നിന്നുള്ള വിഷ് ലഭിച്ചിരുന്നില്ല. "അവർ ഓകെയല്ലേ, ഓകെ ആയിരുന്നെങ്കിൽ അവർ മെസേജ് അയച്ചേനെ," എന്നൊക്കെ മോഹൻലാലിനോട് ഷിജു തന്റെ ഉത്കണ്ഠ പങ്കുവച്ചിരുന്നു. വീടിനകത്ത് അഖിലിനോടും മത്സരാർത്ഥികളിൽ ചിലരോടും സമാനമായ ആശങ്ക ഷിജു പങ്കുവച്ചിരുന്നു.

കുറച്ചു ദിവസങ്ങളായി മകളെ ഓർത്ത് ആശങ്ക പെടുന്ന ഷിജുവിന്റെ മുന്നിലേക്ക് സർപ്രൈസായി ഭാര്യയേയും മകളെയും എത്തിച്ച് വൈകാരിക നിമിഷങ്ങൾക്ക് സാക്ഷിയാവുകയാണ് ബിഗ് ബോസ്.

ഷിജുവിന് പിന്നാലെ അഖിൽ മാരാരുടെ കുടുംബാംഗങ്ങൾ, നാദിറയുടെ സുഹൃത്തുക്കൾ ഇവരൊക്കെ വരാൻ സാധ്യതയുണ്ടെന്നും റിപ്പോർട്ടുകളുണ്ട്. ഒന്നിലധികം മത്സരാർത്ഥികളുടെ പ്രിയപ്പെട്ടവർ ഷോയിലേക്ക് എത്തുമെന്ന സൂചനകൾ കഴിഞ്ഞ ദിവസം പുറത്തു വന്ന പ്രമോ വീഡിയോയും നൽകുന്നുണ്ട്.