Bigg Boss Malayalam Season 5: ബിഗ് ബോസ് മലയാളത്തിന്റെ അഞ്ചാമത്തെ സീസൺ അതിന്റെ 15-ാം ദിവസത്തിലേക്ക് പ്രവേശിക്കുകയാണ്. 18 മത്സരാർത്ഥികളാണ് ഇത്തവണ ഷോയിലുള്ളത്. സംരംഭകയായ ശോഭ വിശ്വനാഥ്, വുഷു ചാംപ്യനായ അനിയൻ മിഥുൻ, സംവിധായകൻ അഖിൽ മാരാർ, ബോഡി ബിൽഡറും മോഡലുമായ വിഷ്ണു ജോഷി, സോഷ്യൽ മീഡിയ താരങ്ങളായ വൈബർ ഗുഡ് ദേവു എന്നറിയപ്പെടുന്ന ശ്രീദേവി, ജുനൈസ് വിപി, നടി മനീഷ കെ എസ്, നടൻ സാഗർ സൂര്യ, ട്രാൻസ് വുമൺ നാദിറ മെഹ്റിൻ, നടി ലെച്ചു ഗ്രാം, നടൻ ഷിജു എ ആർ, നടി ഏഞ്ചലീന മരിയ, നടി റനീഷ റഹ്മാൻ, നടൻ റിനോഷ് ജോർജ്, മിസ് ക്വീൻ കേരള 2022 ആയി തിരഞ്ഞെടുക്കപ്പെട്ട സെറീന, നടി ശ്രുതിലക്ഷ്മി, കോമണറായ ഗോപിക ഗോപി എന്നിവരാണ് ഈ സീസണിലെ മത്സരാർത്ഥികൾ.
ഇതുവരെ മത്സരാർത്ഥികൾ ആരും തന്നെ ബിഗ് ബോസ് വീട്ടിൽ നിന്നും എലിമിനേറ്റായി പോയിട്ടില്ല. എന്നാൽ രണ്ടു ആഴ്ച പിന്നിടുന്നതോടെ വീടിനകത്തേക്ക് ഒരു വൈൽഡ് കാർഡ് എൻട്രി എത്തുന്നു എന്ന സൂചനയാണ് ഏഷ്യാനെറ്റ് ഇന്നു പുറത്തുവിട്ട പ്രൊമോ വീഡിയോ നൽകുന്നത്.
ആരായിരിക്കും ബിഗ് ബോസ് വീട്ടിലേക്ക് 19-ാമത്തെ മത്സരാർത്ഥിയായി എത്തുന്നയാൾ എന്നറിയാനുള്ള ആകാംക്ഷയിലാണ് പ്രേക്ഷകരും. സ്കൂൾ യൂണിഫോമിൽ മീൻ വിറ്റ് സമൂഹ മാധ്യമങ്ങളിൽ ഏറെ വൈറലായ ഹനാൻ ഹമീദ് ആണ് ഈ ആഴ്ച ബിഗ് ബോസ് വീട്ടിലേക്ക് എത്തുന്ന പുതിയ മത്സരാർത്ഥിയെന്നും വാർത്തകളുണ്ട്.
ബിഗ് ബോസിന്റെ പ്രെഡിക്ഷൻ ലിസ്റ്റിൽ ആദ്യം മുതലുള്ള പേരുകളിൽ ഒന്നാണ് ഹനാനിന്റേത്. സോഷ്യൽ മീഡിയയ്ക്ക് ഏറെ സുപരിചിതയാണ് ഹനാൻ. സ്കൂൾ യൂണിഫോമിൽ മീൻ കച്ചവടം നടത്തിയതോടെയാണ് ഹനാൻ വാർത്തകളിൽ നിറഞ്ഞത്. പിന്നീട് നടി, മോഡൽ, സോഷ്യൽ മീഡിയ ഇൻഫ്ലുവെൻസർ എന്നീ നിലകളിലും ഹനാൻ പ്രശസ്തി നേടി.
അതേസമയം, ഹനാൻ അല്ല ‘കുടുംബവിളക്ക്’ സീരിയലിൽ ഡോക്ടർ അനിരുദ്ധ് എന്ന കഥാപാത്രത്തിലൂടെ ശ്രദ്ധേയനായ ആനന്ദ് നാരായണൻ ആണ് ബിഗ് ബോസിലെ ആദ്യ വൈൽഡ് കാർഡ് എൻട്രി എന്നും റിപ്പോർട്ടുകളുണ്ട്.
