Bigg Boss Malayalam Season 5: ഹൗസിനകത്തേയ്ക്ക് തിരികെയെത്തില്ല; മത്സരാർത്ഥികളോട് വിടപറഞ്ഞ് റിനോഷ്

Bigg Boss Malayalam Season 5:ബിഗ് ബോസ് മലയാളം അഞ്ചാം സീസൺ അവസാനിക്കാൻ ഒരാഴ്ച്ച മാത്രം ബാക്കി നിൽക്കെ ഒരാൾ കൂടി മത്സരത്തോട് വിടപറഞ്ഞിരിക്കുകയാണ്. ഹൗസിൽ മികച്ച പ്രകടനം കാഴ്ച്ച വച്ച റിനോഷാണ് പുറത്തായത്. ചില ആരോഗ്യ പ്രശ്നങ്ങളാൽ ആശുപത്രിയിലേക്ക് റിനോഷിനെ മാറ്റിയിരുന്നു. കുറച്ച് ദിവസങ്ങൾക്കുള്ളിൽ റിനോഷ് തിരികെയെത്തുമെന്ന് പ്രതീക്ഷിച്ചിരുന്നെങ്കിലും കൂടുതൽ വിശ്രമം ആവശ്യമായതിനാൽ ഷോയിൽ നിന്ന് പിന്മാറുകയാണ് ഉണ്ടായത്. റിനോഷ് ആരാധകരെ നിരാശരാക്കുന്ന വാർത്തയാണ് ഇന്നലത്തെ എപ്പിസോഡിലൂടെ പുറത്തു വന്നത്.

ഹോട്ടൽ റൂമിലിരുന്ന് സഹമത്സരാർത്ഥികളുമായി റിനോഷ് വീഡിയോ കോൾ ചെയ്തു. പുറത്തിറങ്ങിയപ്പോഴാണ് അവിടെ നിൽക്കുമ്പോഴുള്ള വില മനസ്സിലായതെന്നും റിനോഷ് പറയുന്നുണ്ട്. ഇനി നമ്മൾക്ക് ഫിനാലെയിൽ കാണാമെന്ന് പറഞ്ഞാണ് റിനോഷ് കോൾ അവസാനിപ്പിച്ചത്. മത്സരത്തിൽ തുടരാനാകാത്തതിന്റെ നിരാശയും റിനോഷ് പ്രകടിപ്പിച്ചു. കഴിഞ്ഞ ആഴ്ച്ച നടന്ന ഫാമിലി വീക്കിനെ കുറിച്ചും കുടുംബാംഗങ്ങൾ വന്നപ്പോൾ ഏറ്റവുമധികം തിരക്കിയത് റിനോഷിനെയാണെന്നും മത്സരാർത്ഥികൾ പറയുകയും ചെയ്തു.

ടിക്കറ്റ് ടു ഫിനാലെ ടാസ്കുകൾക്കു പിന്നാലെയാണ് റിനോഷ് തന്റെ ആരോഗ്യപ്രശ്നം ബിഗ് ബോസിനെ അറിയിച്ചത്. സ്കിൻ അലർജിയാണ് പ്രശ്നം. തുടർന്ന് റിനോഷിനെ കണ്ണ് കെട്ടി ആശുപത്രിയിലേക്ക് കൊണ്ടുപോവുകയായിരുന്നു. ടിക്കറ്റ് ടു ഫിനാലെ ടാസ്കിൽ ഏറ്റവും കൂടുതൽ പോയിന്റ് നേടി നാദിറ ഒന്നാമതെത്തിയപ്പോൾ യഥാക്രമം രണ്ട്, മൂന്ന് സ്ഥാനങ്ങൾ നേടിയത് സെറീനയും റിനോഷുമായിരുന്നു.

ഇടയ്ക്ക് അഖിൽ മാരാരെയും ആരോഗ്യപ്രശ്നങ്ങൾ മൂലം ആശുപത്രിയിലേക്ക് മാറ്റിയിരുന്നു. എന്നാൽ രണ്ടു ദിവസം കൊണ്ടു തന്നെ അഖിൽ തിരിച്ചു വരികയായിരുന്നു. എന്നാൽ ഒരു ആഴ്ച്ച പിന്നിട്ടിട്ടും റിനോഷ് തിരികെ എത്തിയിട്ടില്ല എന്നത് പലരെയും നിരാശപ്പെടുത്തിയിരുന്നു. റിനോഷ് ഷോ ക്വിറ്റ് ചെയ്തിട്ടില്ലെന്നും അധികം വൈകാതെ തിരികെയെത്തുമെന്നും താരത്തിന്റെ സോഷ്യൽ മീഡിയ അക്കൗണ്ടിലൂടെ സുഹൃത്തുക്കൾ അറിയിച്ചിരുന്നു. എന്നാൽ ഇപ്പോഴുണ്ടായ ഈ പ്രഖ്യാപനം ഒരുപാട് ആളുകളെ വിഷമത്തിലാക്കും. ഏറ്റവുമധികം ആരാധകരുള്ള മത്സരാർത്ഥികളിൽ ഒരാളാണ് റിനോഷ്. കാര്യങ്ങളെ സൗമ്യമായി കൈകാര്യം ചെയ്യുന്നതും വാക്കുകളിലുള്ള കൃത്യതയുമാണ് റിനോഷിനെ വ്യത്യസ്തനാക്കിയത്.