Bigg Boss Malayalam Season 5:ഒടുവിൽ റിനോഷെത്തി; ഫൈനലിനായി തയാറെടുത്ത് താരങ്ങൾ, വീഡിയോ

Bigg Boss Malayalam Season 5: ബിഗ് ബോസ് മലയാളം അഞ്ചാം സീസണിന്റെ ഫിനാലെ ദിവമാണിന്ന്. സമൂഹത്തിന്റെ നേർകാഴ്ച്ച എന്ന രീതിയിൽ അവതരിപ്പിക്കുന്ന ഷോ കഴിഞ്ഞ നാലു സീസണുകളിലായി മികച്ച വിജയമാണ് സ്വന്തമാക്കിയത്. അഞ്ചാം സീസണിൽ ഏറ്റവും കൂടുതൽ പ്രേക്ഷക പിന്തുണ നേടിയ മത്സരാർത്ഥികളിൽ ഒരാളാണ് റിനോഷ് ജോർജ്. ആരോഗ്യ പ്രശ്നങ്ങൾ മൂലം മത്സരത്തിന്റെ അവസാന ദിവസങ്ങളിലാണ് റിനോഷ് ഷോയിൽ നിന്ന് ക്വിറ്റ് ചെയ്ത്. പുറത്തായ മത്സരാർത്ഥികൾ തിരിച്ച് ഹൗസിലെത്തിയപ്പോഴും പ്രേക്ഷകർ തിരഞ്ഞത് റിനോഷിനെയാണ്. ഇപ്പോഴിതാ ഗ്രാൻഡ് ഫിനാലേയ്ക്ക് എത്തിയ റിനോഷിന്റെ ദൃശ്യങ്ങളാണ് വൈറലാകുന്നത്.

മുംബൈയിൽ മത്സരാർത്ഥികൾ താമസിക്കുന്ന ഫ്ലാറ്റിലാണ് റിനോഷ് എത്തിയതെന്നാണ് വ്യക്തമാകുന്നത്. സ്കിൻ അലർജി മൂലം ആശുപത്രിയിൽ ചികിത്സയിലായിരുന്ന റിനോഷ് വീഡിയോ കോളിലൂടെ എത്തിയാണ് താൻ ക്വിറ്റ് ചെയ്യുന്ന കാര്യം അറിയിച്ചത്. റിനോഷ് എവിടെ പോയി എന്ന് ചോദിക്കുന്ന പ്രേക്ഷകർക്കുള്ള മറുപടിയാണ് ഈ വീഡിയോ. ശാരീരിക അസ്വസ്ഥതകൾ ഭേദപ്പെട്ടെന്നാണ് വീഡിയോയിൽ നിന്നും മനസ്സിലാക്കാനാകുന്നത്.

ടിക്കറ്റ് ടു ഫിനാലെ ടാസ്കുകൾക്കു പിന്നാലെയാണ് റിനോഷ് തന്റെ ആരോഗ്യപ്രശ്നം ബിഗ് ബോസിനെ അറിയിച്ചത്. സ്കിൻ അലർജിയാണ് പ്രശ്നം. തുടർന്ന് റിനോഷിനെ കണ്ണ് കെട്ടി ആശുപത്രിയിലേക്ക് കൊണ്ടുപോവുകയായിരുന്നു. ടിക്കറ്റ് ടു ഫിനാലെ ടാസ്കിൽ ഏറ്റവും കൂടുതൽ പോയിന്റ് നേടി നാദിറ ഒന്നാമതെത്തിയപ്പോൾ യഥാക്രമം രണ്ട്, മൂന്ന് സ്ഥാനങ്ങൾ നേടിയത് സെറീനയും റിനോഷുമായിരുന്നു.

ഇടയ്ക്ക് അഖിൽ മാരാരെയും ആരോഗ്യപ്രശ്നങ്ങൾ മൂലം ആശുപത്രിയിലേക്ക് മാറ്റിയിരുന്നു. എന്നാൽ രണ്ടു ദിവസം കൊണ്ടു തന്നെ അഖിൽ തിരിച്ചു വരികയായിരുന്നു. എന്നാൽ ഒരു ആഴ്ച്ച പിന്നിട്ടിട്ടും റിനോഷ് തിരികെ എത്തിയിട്ടില്ല എന്നത് പലരെയും നിരാശപ്പെടുത്തിയിരുന്നു. റിനോഷ് ഷോ ക്വിറ്റ് ചെയ്തിട്ടില്ലെന്നും അധികം വൈകാതെ തിരികെയെത്തുമെന്നും താരത്തിന്റെ സോഷ്യൽ മീഡിയ അക്കൗണ്ടിലൂടെ സുഹൃത്തുക്കൾ അറിയിച്ചിരുന്നു. എന്നാൽ ഇപ്പോഴുണ്ടായ ഈ പ്രഖ്യാപനം ഒരുപാട് ആളുകളെ വിഷമത്തിലാക്കും. ഏറ്റവുമധികം ആരാധകരുള്ള മത്സരാർത്ഥികളിൽ ഒരാളാണ് റിനോഷ്. കാര്യങ്ങളെ സൗമ്യമായി കൈകാര്യം ചെയ്യുന്നതും വാക്കുകളിലുള്ള കൃത്യതയുമാണ് റിനോഷിനെ വ്യത്യസ്തനാക്കിയത്.