ഷേവിങ്ങ് സെറ്റും ടിക്കറ്റ് ടു ഫിനാലെയും; നാദിറയുടെ ബാഗിനുള്ളിലെ വെറൈറ്റി ഐറ്റംസ്

ബിഗ് ബോസ് ഹൗസിലെ മത്സരങ്ങൾ അവസാനിച്ചെങ്കിലും സോഷ്യൽ മീഡിയയിൽ എങ്ങും നിറയുന്നത് മത്സരാർത്ഥികളുടെ വിശേഷങ്ങൾ തന്നെയാണ്. സൗഹൃദം പങ്കിടുന്ന താരങ്ങളുടെ വീഡിയോയും ചിത്രങ്ങളുമെല്ലാം അതിവേഗമാണ് വൈറലാകുന്നത്. ഷോയിലെ ഏറ്റവുമധികം ജനപ്രീതി നേടിയ മത്സരാർത്ഥിയായിരുന്നു നാദിറ. ട്രാൻസ്ജെൻഡർ വ്യക്തിയായ നാദിറ തന്റെ മാതാപിതാക്കളുമായി വർഷങ്ങൾക്കു ശേഷം ഒന്നിച്ച നിമിഷങ്ങളെല്ലാം ഏറെ സന്തോഷത്തോടെയാണ് പ്രേക്ഷകർ ഏറ്റെടുത്തത്.

ബിഗ് ബോസ് താരങ്ങളുടെ അഭിമുഖങ്ങളാണിപ്പോൾ സോഷ്യൽ മീഡിയയിൽ നിറയുന്നത്. നാദിറ ഒരു ഓൺലൈൻ ചാനലിനു നൽകിയ അഭിമുഖത്തിനിടയിൽ വാട്സ് ഇൻ മൈ ബാഗ് സെഷൻ ചെയ്തിരുന്നു. നാദിറയുടെ വീഡിയോ ഇപ്പോൾ സോഷ്യൽ മീഡിയയിൽ വൈറലാവുകയാണ്.

തന്റെ ഒരു ബന്ധു ഗിഫ്റ്റ് ചെയ്ത ബാഗാണ് നാദിറ ഉപയോഗിക്കുന്നത്. അതിന് അകത്തുള്ള ഓരോ വസ്തുക്കൾ പ്രേക്ഷകർക്കായി പരിചയപ്പെടുത്തുകയാണ് നാദിറ. തന്റെ വാലറ്റിൽ നിന്ന് ട്രാൻസ്ജെൻഡർ ഐഡന്റിറ്റി കാർഡാണ് ആദ്യം കാണിക്കുന്നത്. പിന്നീട് ഷേവിങ്ങ് സെറ്റ്, ഹോർമോൺ ഗുളിക എന്നിവയെല്ലാം കാണാം. ബിഗ് ബോസിൽ നിന്ന് ലഭിച്ച ടിക്കറ്റ് ടു ഫിനാലെ കാർഡും പെർഫ്യൂമുകളും തന്റെ ബാഗിൽ നാദിറ സൂക്ഷിച്ചിട്ടുണ്ട്.

തന്റെ കയ്യിലുള്ള മൂന്ന് മൊബൈൽ ഫോണുകളും നാദിറ കാണിക്കുന്നുണ്ട്. അതിലൊന്നിന്റെ ലോക്ക് ബിഗ് ബോസ് ഹൗസിൽ നിന്ന് പുറത്തിറങ്ങിയപ്പോഴേക്കും താൻ മറന്നു പോയെന്നും നാദിറ പറയുന്നു.

ബിഗ് ബോസ് മലയാളം അഞ്ചാം സീസണിൽ ഏറെ ജനപ്രീതിയുള്ള മത്സരാർത്ഥികളിൽ ഒരാളാണ് നാദിറ മെഹ്റിൻ. ആദ്യ ദിനം മുതൽ മികച്ച പ്രകടനം കാഴ്ച്ചവച്ച് മുന്നേറിയ നാദിറ ടിക്കറ്റ് ടു ഫിനാലെയും സ്വന്തമാക്കിയിരുന്നു. ഒടുവിൽ ഏഴര ലക്ഷത്തിന്റെ പണപ്പെട്ടിയുമെടുത്ത് നാദിറ ബിഗ് ബോസ് ഹൗസിൽ നിന്ന് പടിയിറങ്ങുകയായിരുന്നു.