വിവാഹ വേദിയിൽ അപ്രതീക്ഷിതമായെത്തി ബിഗ് ബോസ് താരങ്ങൾ

ബിഗ് ബോസ് മലയാളം അഞ്ചാം സീസണിലെ മത്സരാർത്ഥികളുടെ വീഡിയോകളും ചിത്രങ്ങളുമാണിപ്പോൾ സോഷ്യൽ മീഡിയയിൽ ശ്രദ്ധ നേടുന്നത്. മത്സരത്തിൽ​ ഏറെ ആരാധകരുള്ള താരങ്ങളായിരുന്നു റിനോഷും ജുനൈസും. ഇരുവരും ഒന്നിച്ച് ഒരു കല്യാണ വീട്ടിലെത്തിയതിന്റെ ദൃശ്യങ്ങളാണ് ഇപ്പോൾ വൈറലാകുന്നത്.

തങ്ങളുടെ ഫ്ലാറ്റിനടുത്ത് ഒരു വീട്ടിൽ വിവാഹം പന്തൽ കണ്ട് ഓടിയെത്തിയതാണ് താരങ്ങൾ. മണവാട്ടിയെ വേദിയിലേക്ക് ക്ഷണിക്കുന്നത് വീഡിയോയിൽ കാണാം. പിന്നീട് വിവാഹ വീട്ടിലെ ആഘോഷങ്ങളിൽ താരങ്ങൾ പങ്കെടുക്കുകയാണ്. റിനോഷിനോട് പാട്ട് പാടാൻ ആവശ്യപ്പെടുന്നതും വീഡിയോയിൽ കാണാനാകും. എല്ലാവരുടെയും താത്പര്യ പ്രകാരം റിനോഷ് ഗാനം ആലപിക്കുകയും ചെയ്തു. ജുനൈസിന്റെ ആമിന താത്തയുടെ പ്രകടനം കാണണമെന്നും ആളുകൾ പറയുന്നുണ്ട്.

ജുനൈസ് തന്റെ ഫെയ്സ്ബുക്ക് പ്രൊഫൈലിലൂടെയാണ് വീഡിയോ പങ്കുവച്ചത്. "വിളിക്കാത്ത കല്യാണത്തിനു ഓടി ചെന്ന് ബാലേട്ടനും വിജയനും," എന്നാണ് വീഡിയോയ്ക്ക് താഴെ കുറിച്ച അടികുറിപ്പ്. വിവാഹത്തിന് ആശംസകൾ അറിയിച്ചാണ് താരങ്ങൾ വേദിയിൽ നിന്നിറങ്ങിയത്.

ജൂലൈ 2നായിരുന്നു ബിഗ് ബോസ് മലയാളം അഞ്ചാം സീസണിന്റെ ഫിനാലെ. അഖിൽ മാരാർ വിജയ കീരിടം നേടിയപ്പോൾ റെനീഷയാണ് രണ്ടാം സ്ഥാനം സ്വന്തമാക്കിയത്. ജുനൈസിന് മൂന്നാം സ്ഥാനമായിരുന്നു. ഈ സീസണിൽ ഏറെ ജനപ്രീതിയുള്ള മത്സരാർത്ഥിയായിരുന്നു റിനോഷ്. എന്നാൽ ചില ആരോഗ്യ പ്രശ്നങ്ങൾ മൂലം റിനോഷിന് അവസാന നാളുകളിൽ മത്സരം അവസാനിപ്പിക്കേണ്ടി വന്നു.