ഇതെന്റെ ഭാഗ്യം, നായനാർ അപ്പൂപ്പൻ ആദ്യാക്ഷരം കുറിച്ചപ്പോൾ; ഓർമ പങ്കിട്ട് എലീന പടിക്കൽ

ബിഗ് ബോസ് താരവും നടിയും അവതാരകയുമായ എലീന പടിക്കൽ മിനിസ്ക്രീൻ പ്രേക്ഷകർക്ക് ഏറെ പരിചിതയാണ്. വിജയദശമി ദിനത്തിൽ എലീന പങ്കിട്ട തന്റെ കുട്ടിക്കാലത്തു നിന്നുള്ള ഒരു ഓർമചിത്രമാണ് ഇപ്പോൾ വൈറലാവുന്നത്.

അന്തരിച്ച മുൻമുഖ്യമന്ത്രി ഇ കെ നായനാരിന്റെ മടിയിൽ ഇരുന്ന് ആദ്യാക്ഷരം കുറിക്കുന്ന കുഞ്ഞു എലീനയെ ചിത്രത്തിൽ കാണാം. "ഞാൻ എത്ര ഭാഗ്യവതിയാണ്. എന്റെ മാതാപിതാക്കൾക്കും, 'നായനാർ അപ്പൂപ്പൻ', 'ടീച്ചറമ്മ' (ഞാൻ അവരെ അങ്ങനെ വിളിക്കുന്നത് കേൾക്കാൻ അവർ ഇഷ്ടപ്പെട്ടതുപോലെ) നന്ദി. എനിക്ക് ചുറ്റുമുള്ള ഈ മികച്ച മനുഷ്യരെല്ലാം പഠിപ്പിച്ച പാഠങ്ങൾ എന്നെ ഏറ്റവും മികച്ച വ്യക്തിയാക്കിയെന്ന് ഞാൻ വിശ്വസിക്കുന്നു," എന്നാണ് എലീന കുറിച്ചത്.

ഇകെ നായനാർ സിപിഎം സംസ്ഥാന സെക്രട്ടറിയായ കാലത്തു നിന്നുള്ളതാണ് ഊ ചിത്രം. അവിചാരിതയമായിട്ടാണ് എലീനയുടെ പിതാവായ ഫിലിപ്പോസ് പടിക്കലിന്റെ സ്നേഹനിർബന്ധത്തിനു വഴങ്ങി നായനാർ കുഞ്ഞിനെ എഴുത്തിനിരുത്തിയത്. വഴുതക്കാട് ഈശ്വരവിലാസം റോഡിലെ വാടകവീട്ടിലായിരുന്നു നായനാർ മൂന്നര വയസ്സുകാരിയെ എഴുത്തിനിരുത്തിയത്.