ഉപയോക്താക്കള്‍ക്ക് എളുപ്പത്തില്‍ ഉപയോഗിക്കാം; വാട്‌സ്ആപ്പ് നാവിഗേഷന്‍ ബാറിന്റെ സ്ഥാനം മാറ്റുന്നു

ന്യൂഡല്‍ഹി:ഇന്റര്‍നെറ്റിലൂടെ നിങ്ങളുടെ സുഹൃത്തുക്കള്‍ക്കോ ?കുടുംബാംഗങ്ങള്‍ക്കോ ?സഹപ്രവര്‍ത്തകര്‍ക്കോ കോള്‍ ചെയ്യുന്നതിനും സന്ദേശം അയക്കുന്നതിനോ ഫയലുകള്‍ അയയ്ക്കാനോ നിങ്ങള്‍ ആഗ്രഹിക്കുന്നുവെങ്കില്‍ ഏറ്റവും ജനപ്രിയമായ ആപ്പുകളില്‍ ഒന്നാണ് വാട്‌സ്ആപ്പ്.
വാട്‌സ്ആപ്പില്‍ പുതിയ സവിശേഷതകള്‍ കൊണ്ടുവരാന്‍ ഡവലപ്പര്‍മാര്‍ നിരന്തരം പ്രവര്‍ത്തിക്കുമ്പോള്‍ ആപ്പിന്റെ ആന്‍ഡ്രോയിഡ്, ഐഒഎസ് പതിപ്പുകള്‍ താരതമ്യം ചെയ്താല്‍ ഉപയോക്തൃ ഇന്റര്‍ഫേസില്‍ പൊരുത്തക്കേട് അനുഭവപ്പെടുന്നു.

എന്നാല്‍ വാബീറ്റഇന്‍ഫോയുടെ ഒരു റിപ്പോര്‍ട്ട് അനുസരിച്ച് ഇതില്‍ ഉടന്‍ തന്നെ മാറ്റമുണ്ടായേക്കാമെന്നാണ്. വാട്ട്സ്ആപ്പ് ഡെവലപ്പര്‍മാര്‍ ചാറ്റുകള്‍, കോളുകള്‍, കമ്മ്യൂണിറ്റികള്‍, സ്റ്റാറ്റസ് ടാബുകള്‍ എന്നിവ ആപ്പിന്റെ ഐഒഎസ് പതിപ്പിന് സമാനമായി നാവിഗേഷന്‍ ബാര്‍ സ്‌ക്രീനിന്റെ താഴേക്ക് നീക്കുന്നതായാണ് റിപ്പോര്‍ട്ട്. ആപ്ലിക്കേഷന്റെ ഉപയോക്തൃ ഇന്റര്‍ഫേസ് നവീകരിക്കാന്‍ ആവശ്യപ്പെടുന്ന ഉപയോക്താക്കള്‍ക്കുള്ള പ്രതികരണമാണ് ഈ മാറ്റമെന്നും റിപ്പോര്‍ട്ട് സൂചിപ്പിക്കുന്നു.

വരാനിരിക്കുന്ന മാറ്റം ആന്‍ഡ്രോയിഡിനുള്ള വാട്ട്സ്ആപ്പ് ബീറ്റയുടെ ഏറ്റവും പുതിയ പതിപ്പില്‍ (2.23.8.4) കാണാം. സമീപഭാവിയില്‍ സ്ഥിരതയുള്ള പതിപ്പിലേക്കുള്ള വഴി കണ്ടെത്തിയേക്കാം. നാവിഗേഷന്‍ ബാര്‍ താഴെ ക്രമീകരിക്കുന്നതിലൂടെ വലിയ ഫോണുകളുള്ള ഉപയോക്താക്കള്‍ക്ക് ഒരു കൈ ഉപയോഗിച്ച് വിവിധ ടാബുകള്‍ എടുക്കാന്‍ എളുപ്പമാണ്. പുതിയ മാറ്റം നിലവില്‍ വികസന ഘട്ടത്തിലാണെന്നും മറ്റ് ചില മെച്ചപ്പെടുത്തലുകള്‍ക്കൊപ്പം ആപ്പിന്റെ ഭാവി പതിപ്പില്‍ ലഭ്യമാകും.

വ്യക്തിഗത ചാറ്റുകള്‍ ലോക്ക് ചെയ്യാനുള്ള കഴിവ്, ഐഫോണ്‍ ഉപയോക്താക്കള്‍ക്കുള്ള വീഡിയോ സന്ദേശങ്ങള്‍, വോയ്സ് നോട്ടുകള്‍ സ്റ്റാറ്റസ് അപ്ഡേറ്റുകളായി സജ്ജീകരിക്കുക, പുതിയ ഗ്രൂപ്പ് അംഗങ്ങളെ അസെപ്റ്റ് ചെയ്യുക എന്നിവ ഉള്‍പ്പെടെ പുതിയ സവിശേഷതകള്‍ കൊണ്ടുവരാന്‍ ഈ വര്‍ഷത്തിന്റെ തുടക്കം മുതല്‍ വാട്ട്സ്ആപ്പ് ഡെവലപ്പര്‍മാര്‍ പ്രവര്‍ത്തിക്കുകയാണ്.