വാട്‌സ്ആപ്പില്‍ ഉപയോക്താക്കള്‍ക്കായി പുതിയ ഫീച്ചര്‍ ഒരുക്കി മെറ്റ. ഉപയോകതാക്കള്‍ക്ക് സ്വന്തം അക്കൗണ്ടിലേക്ക് തന്നെ സന്ദേശം അയക്കാവുന്ന സൗകര്യമാണ് പുതുതായി ഉള്‍പ്പെടുത്തിയിരിക്കുന്നത്. പുതിയ സൗകര്യം ഉപയോക്താക്കളെ കുറിപ്പുകള്‍ അയയ്ക്കാനും, ഓര്‍ത്തെടുക്കേണ്ടവ സൂക്ഷിക്കാനും സഹായിക്കുന്നു. ഈ ഫീച്ചര്‍ ഉപയോഗിച്ച്, ഉപയോക്താക്കള്‍ക്ക് സന്ദേശങ്ങളും ചിത്രങ്ങളും വീഡിയോകളും ഓഡിയോയും സ്വയം പങ്കിടാന്‍ കഴിയും. ഐഫോണ്‍, ആന്‍ഡ്രോയിഡ് സ്മാര്‍ട്ട്‌ഫോണ്‍ ഉപയോക്താക്കള്‍ക്ക് വാട്ട്സ്ആപ്പ് ‘മെസേജ് യുവര്‍സെല്‍ഫ്’ ലഭ്യമാകും, വരും ആഴ്ചകളില്‍ ഈ ഫീച്ചര്‍ എല്ലാ വാട്ട്സ്ആപ്പ് ഉപയോക്താക്കള്‍ക്കും ലഭ്യമാക്കുമെന്ന് കമ്പനി സ്ഥിരീകരിച്ചു, അതിനാല്‍, പുതിയ ഫീച്ചര്‍ ഉപയോഗിക്കാന്‍ കുറച്ച് ദിവസങ്ങള്‍ കാത്തിരിക്കേണ്ടി വന്നേക്കാം.
വാട്‌സ്ആപ്പ് ‘മെസേജ് യുവര്‍സെല്‍ഫ് ‘ ഫീച്ചര്‍ എങ്ങനെ ഉപയോഗിക്കാം?
വാട്‌സ്ആപ്പില്‍ നിങ്ങള്‍ക്ക് തന്നെ മെസേജ് അയക്കുന്ന ഫീച്ചര്‍ ലഭിക്കാന്‍ പ്ലേസ്‌റ്റോറില്‍ നിന്നോ ആപ്പിള്‍ ആപ്പ് സ്‌റ്റോറില്‍ നിന്നോ നിങ്ങളുടെ ആപ്പ് അപ്ഡേറ്റ് ചെയ്്തു എന്ന് ഉറപ്പാക്കുക. അപ്ഡേറ്റ് ചെയ്ത വാട്ട്സ്ആപ്പ് ആപ്പ് തുറക്കുക, ക്രിയേറ്റ് ചാറ്റ് എന്ന ഒപ്ഷനില്‍ ക്ലിക്ക് ചെയ്യുക, കോണ്‍ടാക്റ്റുകളില്‍ നിങ്ങളുടെ സ്വന്തം നമ്പര്‍ കാണാന്‍ കഴിയും. നിങ്ങളുടെ നമ്പര്‍ തിരഞ്ഞെടുത്ത് സന്ദേശമയയ്ക്കുക.
ഈ ഫീച്ചര്‍ ഉപയോഗിച്ച്, ഉപയോക്താക്കള്‍ക്ക് അവരുമായി കുറിപ്പുകള്‍ പങ്കിടാനും ആപ്പിനുള്ളിലെ മറ്റ് ചാറ്റുകളില്‍ നിന്ന് അവര്‍ക്ക് ഒരു സന്ദേശമോ മള്‍ട്ടിമീഡിയ ഫയലോ കൈമാറാനും കഴിയും. നിങ്ങള്‍ക്ക് വാട്ട്സ്ആപ്പില്‍ വോയ്സ് നോട്ടുകള്‍ റെക്കോര്‍ഡുചെയ്യാനും ഫോട്ടോകള്‍ ക്ലിക്കുചെയ്യാനും അവ നിങ്ങള്‍ക്കായി സൂക്ഷിക്കാനും കഴിയും.
വാട്ട്സ്ആപ്പ് ഡെസ്‌ക്ടോപ്പുകളിലും വെബിലും പ്രവര്‍ത്തിക്കുന്നതിനാല്‍, കണക്റ്റുചെയ്ത എല്ലാ ഉപകരണങ്ങളിലും ഉപയോക്താക്കള്‍ക്ക് ഈ സന്ദേശങ്ങള്‍ കാണാനാകും. വോയ്സ് സ്റ്റാറ്റസ്, വെബിലൂടെയുള്ള വോയ്സ് കോളുകള്‍ എന്നിവയും വരും ദിവസങ്ങളില്‍ വാട്ട്സ്ആപ്പില്‍ ലഭ്യമാകുമെന്നാണ് പ്രതീക്ഷ.
