സാംസങ് ഗ്യാലക്സി എം 30 ഇന്ത്യയിൽ, വിലയും സവിശേഷതകളും അറിയാം

സാംസങ് എം സീരീസിലെ പുതിയ മോഡലായ ഗ്യാലക്സി എം30 കമ്പനി ഇന്ത്യയിൽ അവതരിപ്പിച്ചു. ഇപ്പോൾ മുതൽ ഫോൺ ബുക്ക് ചെയ്യാം. മാർച്ച് 7 മുതലായിരിക്കും ഫോൺ ലഭിച്ചു തുടങ്ങുക. ആമസോൺ, സാംസങ് ഡോട് കോം വഴി മാത്രമായിരിക്കും ഫോൺ വാങ്ങാൻ സാധിക്കുക. 4 ജിബി റാമും 64 ജിബി സ്റ്റോറേജുമുളള വേരിയന്റിന് 14,990 രൂപയാണ് വില. 6 ജിബി റാമും 128 ജിബി സ്റ്റോറേജുമുളള വേരിയന്റിന് 17,990 രൂപയാണ് വില.

ഫോണിന്റേത് 6.4 ഇഞ്ച് ഫുൾ എച്ച്ഡി പ്ലസ് സൂപ്പർ അമോൾഡ് ഡിസ്‌പ്ലേയാണ്. ടോപ്പിൽ യു ഷേപ് നോച്ച് ആണുളളത്. ട്രിപ്പിൾ ക്യാമറയാണ് ഫോണിന്റെ സവിശേഷത. 20,000 രൂപ വില വരുന്ന സാംസങ് ഫോൺ കാറ്റഗറിയിൽ ട്രിപ്പിൾ ക്യാമറയുളള ആദ്യ ഫോണാണിത്. 13 മെഗാപിക്സലാണ് പ്രൈമറി ക്യാമറ. സെൽഫിക്കായി മുന്നിൽ 16 മെഗാപിക്സലിന്റെ ക്യാമറയുണ്ട്. 5000 എംഎഎച്ച് ആണ് ബാറ്ററി.

സുരക്ഷയ്ക്കായി റിയർ മൗണ്ടഡ് ഫിംഗർപ്രിന്റ് സെൻസറും ഫെയ്സ് അൺലോക്കുമുണ്ട്. യുഎസ്ബി-സി പോർട്ടും 3.5 എംഎം ഹെഡ്ഫോൺ ജാക് ഉൾപ്പെടെയാണ് ഫോൺ എത്തിയിട്ടുളളത്. ഗ്രേഡിയേഷൻ ബ്ലാക്ക്, ഗ്രേഡിയേഷൻ ബ്ലൂ എന്നീ നിറങ്ങളിലാണ് ഫോൺ ലഭിക്കുക.