നിലാവില്‍ 'നടന്ന്' റോവര്‍; എല്ലാം നിയന്ത്രണത്തില്‍, ഇനി ചിത്രങ്ങള്‍ക്കായുള്ള കാത്തിരിപ്പ്

ചാന്ദ്രയാന്‍ 3 ചന്ദ്രന്റെ ദക്ഷിണ ധ്രുവത്തിലിറങ്ങിയതിന് പിന്നാലെ പേടകത്തിലെ ഉപകരണങ്ങളെല്ലാം പ്രവര്‍ത്തിക്കാന്‍ തുടങ്ങിയതായി ഇന്ത്യന്‍ സയന്‍സ് റിസേര്‍ച്ച് ഓര്‍ഗനൈസേഷന്‍ (ഐഎസ്ആര്‍ഒ) അറിയിച്ചു. റോവറിന്റെ ചന്ദ്രോപരിതലത്തിലൂടെയുള്ള നീക്കവും ആരംഭിച്ചതായി ഐഎസ്ആര്‍ഒ സ്ഥിരീകരിച്ചു.

ലാന്‍ഡിങ്ങിന് തൊട്ട് മുന്‍പ് മുതല്‍ ലാന്‍ഡിങ് വരെയുള്ള ലാന്‍ഡറില്‍ നിന്നുള്ള ദൃശ്യങ്ങളും ഐഎസ്ആര്‍ഒ സമൂഹ മാധ്യമമായ എക്സിലൂടെ പങ്കുവച്ചു.

ഇന്ന് രാവിലെയാണ് ലാന്‍‍ഡറില്‍ നിന്ന് റോവര്‍ വേര്‍പെട്ടതായും ചന്ദ്രനിലൂടെ നീങ്ങിയതായും ഐസ്ആര്‍ഒ അറിയിച്ചത്.

റോവര്‍ ചന്ദ്രനിലൂടെ നീങ്ങുന്നതിന്റെ വീഡിയോയും ചിത്രങ്ങളും നിലവില്‍ ലഭിച്ചിട്ടില്ല.

ലാന്‍ഡറിന്റേയും റോവറിന്റേയും പ്രവര്‍ത്തനങ്ങള്‍ പ്രതീക്ഷിച്ച പ്രകാരം തന്നെയാണ് മുന്നോട്ട് പോകുന്നതെന്നും പ്രവര്‍ത്തനത്തില്‍ പ്രശ്നങ്ങളൊന്നുമില്ലെന്നും ഐഎസ്ആര്‍ഒ ചെയര്‍മാന്‍ എസ് സോമനാഥിനെ ഉദ്ധരിച്ചുകൊണ്ട് പിടിഐ റിപ്പോര്‍ട്ട് ചെയ്തു.

ഇന്നലെ വൈകുന്നേരം 6.04 ന് ലാന്‍ഡ് ചെയ്തതിന് ശേഷം മണിക്കൂറുകള്‍ കഴിഞ്ഞാല്‍ ലാന്‍ഡറില്‍ നിന്ന് റോവര്‍ പുറത്തിറങ്ങിയത്. ലാന്‍ഡിങ് മൂലമുണ്ടായ പൊടി പടലങ്ങള്‍ കാരണമാണ് പ്രക്രിയ വൈകിയത്.