Motorola Moto G 5G: Price, Features, Full Specifications: രാജ്യത്ത് ഏറ്റവും താങ്ങാനാവുന്ന വിലയിലുള്ള 5 ജി റെഡി സ്മാർട്ട്‌ഫോണായ മോട്ടോ ജി 5 ജി സ്മാർട്ട്‌ഫോൺ ഇന്ത്യയിൽ പുറത്തിറക്കി മോട്ടോറോള. ഇന്ത്യയിൽ മോട്ടറോള മോട്ടോ ജി 5 ജിയുടെ വില 20,999 രൂപയിൽ ആരംഭിക്കുന്നു. ഇത് 30,000 രൂപയിൽ താഴെയുള്ള 5 ജി റെഡി ഫോണായ വൺപ്ലസ് നോർഡിനേക്കാൾ വിലകുറഞ്ഞതാണ്. 5 ജി കണക്റ്റിവിറ്റിയെ പിന്തുണയ്‌ക്കുന്ന ക്വാൽകോം സ്‌നാപ്ഡ്രാഗൺ 750 ജി പ്രോസസറുമായാണ് ഏറ്റവും പുതിയ മോട്ടോ ഫോൺ വരുന്നത്.

ലോഞ്ച് ഓഫറിന്റെ ഭാഗമായി എച്ച്ഡിഎഫ്സി ബാങ്ക് കാർഡിൽ മോട്ടറോള ഉപഭോക്താക്കൾക്ക് 1,000 രൂപ ഇൻസ്റ്റന്റ് കിഴിവ് നൽകുന്നു. അതിനാൽ, ഇപ്പോൾ വാങ്ങുന്നവർക്ക് 19,999 രൂപയ്ക്ക് ഈ ഫോൺ വാങ്ങാൻ കഴിയും. എസ്‌ബി‌ഐ, ആക്‌സിസ് ബാങ്ക് കാർഡുകളിൽ അഞ്ച് ശതമാനം ക്യാഷ്ബാക്ക് ഓഫറും ഉണ്ട്. മോട്ടറോള മോട്ടോ ജി 5 ജി ഡിസംബർ 7 ന് ഉച്ചയ്ക്ക് 12:00 ന് വിൽപ്പനയ്‌ക്കെത്തും. ഫോൺ ഫ്ലിപ്കാർട്ട് വഴി ലഭ്യമാകും. വോൾക്കാനോ ഗ്രേ, ഫ്രോസ്റ്റഡ് സിൽവർ എന്നിങ്ങനെ രണ്ട് കളർ ഓപ്ഷനുകളിൽ ഫോൺ വിൽപ്പനയ്‌ക്കെത്തും.

Motorola Moto G 5G: Specifications, features- മോട്ടറോള മോട്ടോ ജി 5 ജി: സവിശേഷതകൾ,

പുതുതായി പുറത്തിറക്കിയ മോട്ടറോള മോട്ടോ ജി 5 ജിയിൽ 6.7 ഇഞ്ച് എൽടിപിഎസ് ഡിസ്‌പ്ലേയുണ്ട്. പൊടിയിൽ നിന്നുള്ള സംരക്ഷണത്തിനായി ഇത് ഐപി52 സർട്ടിഫൈഡ് ആണ്. സ്മാർട്ട്‌ഫോൺ ആൻഡ്രോയ്ഡ് 10ൽ പ്രവർത്തിപ്പിക്കുന്നു.

ക്വാൽകോം സ്‌നാപ്ഡ്രാഗൺ 750 ജി ചിപ്‌സെറ്റ് ആണ് ഫോണിൽ. 6 ജിബി റാമും 128 ജിബി സ്റ്റോറേജുമുണ്ട്. സ്റ്റോറേജ് മൈക്രോ എസ്ഡി കാർഡ് ഉപയോഗിച്ച് 1 ടിബി വരെ വികസിപ്പിക്കാനാകും.

മോട്ടോ ജി 5 ജിയിൽ പിറകിൽ മൂന്ന് ക്യാമറകളാണ്. എഫ് / 1.7 അപ്പേർച്ചറുള്ള 48 മെഗാപിക്സൽ പ്രൈമറി ക്യാമറയും 118 ഡിഗ്രി വ്യൂവുള്ള 8 മെഗാപിക്സൽ എഫ് / 2.2 സെക്കൻഡറി വൈഡ് ആംഗിൾ സെൻസറും ഉൾപ്പെടുന്നു. എഫ് / 2.4 അപ്പേർച്ചറുള്ള 2 മെഗാപിക്സൽ മാക്രോ സെൻസറും ഉണ്ട്. മുൻവശത്ത്, എഫ് / 2.2 അപ്പേർച്ചറുള്ള 16 മെഗാപിക്സൽ സെൽഫി ക്യാമറയുണ്ട്.

ബയോമെട്രിക് തിരിച്ചറിയലിന്യാ കമ്പനി ഫോണിന്റെ പിൻഭാഗത്ത് ഫിംഗർപ്രിന്റ് സെൻസർ ചേർത്തിട്ടുണ്ട്. 20വാട്ട് ടർബോപവർ ഫാസ്റ്റ് ചാർജിംഗ് പിന്തുണയോടെ 5,000 എംഎഎച്ച് ബാറ്ററിയാണ് മോട്ടോ ജി 5 ജിയിൽ. ഉപയോക്താക്കൾക്ക് രണ്ട് ദിവസം വരെ ബാറ്ററി ലൈഫ് ലഭിക്കുമെന്ന് മോട്ടറോള അവകാശപ്പെടുന്നു. കണക്റ്റിവിറ്റിയുടെ കാര്യത്തിൽ, ഹാൻഡ്‌സെറ്റിന് 5 ജി പിന്തുണ, എൻ‌എഫ്‌സി, ബ്ലൂടൂത്ത് 5.1, വൈ-ഫൈ 802.11എസി, യുഎസ്ബി ടൈപ്പ്-സി പോർട്ട്, ജി‌പി‌എസ് എന്നിവ അടക്കമുള്ള കണക്ടിവിറ്റി സപ്പോർട്ട് ഉണ്ട്.

Get all the Latest Malayalam News and Kerala News at Indian Express Malayalam. You can also catch all the Technology News in Malayalam by following us on Twitter and Facebook