ഹമാസുമായി ബന്ധപ്പെട്ട തെറ്റായ വിവരങ്ങള്‍: ഉള്ളടക്കങ്ങള്‍ നീക്കം ചെയ്യാന്‍ മെറ്റ

ഹമാസിനെ പ്രശംസിക്കുന്നതും പിന്തുണക്കുന്നതുമായ ഉള്ളടക്കങ്ങള്‍ പ്ലാറ്റ്ഫോമുകളില്‍ നിന്ന് നീക്കം ചെയ്യുന്നതുള്‍പ്പെടെയുള്ള നടപടികള്‍ സ്വീകരിക്കുന്നതായി മെറ്റ. തെറ്റായ വിവരങ്ങള്‍ നല്‍കുന്ന സോഷ്യമീഡിയ കമ്പനികളെ യൂറോപ്യന്‍ യൂണിയന്‍ വിമര്‍ശിച്ച പശ്ചാത്തലത്തിലാണ് നീക്കം. ഒക്ടോബര്‍ 7-ന് ഹമാസ് ഇസ്രയേലിനെ ആക്രമിച്ചതു മുതല്‍, തെറ്റിദ്ധരിപ്പിക്കുന്ന അവകാശവാദങ്ങളും വ്യാജ ചിത്രങ്ങളും ഫേസ്ബുക്കിലും മറ്റ് സോഷ്യല്‍ മീഡിയകളിലും പ്രചരിച്ചിരുന്നു.

ആക്രമണത്തിന് ശേഷം മൂന്ന് ദിവസത്തിനുള്ളില്‍, ഹീബ്രുവിലോ അറബിയിലോ ഉള്ള 795,000-ലധികം ഉള്ളടക്കങ്ങള്‍ നീക്കം ചെയ്യുകയോ കണ്ടെത്തുകയോ ചെയ്തതായി മെറ്റ അറിയിച്ചു. ഹമാസ് ബന്ദികളാക്കിയവരുടെ ദുരനുഭവങ്ങളും സാഹചര്യങ്ങളും അറിയിക്കാന്‍ ആണെങ്കിലും
അവരെ തിരിച്ചറിയുന്ന വിധമുള്ള ഉള്ളടക്കം നീക്കം ചെയ്യും. ഇരകളെ തിരിച്ചറിയാത്ത വിധം വ്യക്തമല്ലാത്ത ചിത്രങ്ങളുള്ള ഉള്ളടക്കം ഇപ്പോഴും അനുവദനീയമാണ്, എന്നാല്‍ ബന്ദികളായവരുടെ ഇരകളുടെ സുരക്ഷയ്ക്കും സ്വകാര്യതയ്ക്കും ഉറപ്പില്ലെങ്കില്‍ കമ്പനി ഇവ നീക്കം ചെയ്യുന്നതില്‍ മുന്‍ഗണന നല്‍കും. ആക്രമണത്തെത്തുടര്‍ന്ന് ഹമാസ് നിരവധി ഇസ്രായേലികളെയും വിദേശികളെയും ഗസ്സയിലേക്ക് ബന്ദികളാക്കി കൊണ്ടുപോയിട്ടുണ്ട്. ബന്ദികളുടെ ദൃശ്യങ്ങള്‍ സംപ്രേക്ഷണം ചെയ്യുമെന്ന ഹമാസിന്റെ ഭീഷണിയെക്കുറിച്ച് തങ്ങള്‍ക്ക് അറിയാമെന്നും അത്തരം ഉള്ളടക്കം വേഗത്തില്‍ നീക്കംചെയ്യുമെന്നും പകര്‍പ്പുകള്‍ പങ്കിടുന്നത് തടയുമെന്നും മെറ്റ പറഞ്ഞു.

ഫേസ്ബുക്ക്, ഇന്‍സ്റ്റഗ്രാം, ത്രെഡ്‌സ് പ്ലാറ്റ്ഫോമുകളില്‍ ഉടനീളം ഇത്തരം നിയമങ്ങള്‍ ലംഘിക്കാന്‍ സാധ്യതയുള്ള ഉള്ളടക്കം ശുപാര്‍ശ ചെയ്യുന്നത് ഒഴിവാക്കാന്‍ സാങ്കേതികവിദ്യ പ്രവര്‍ത്തിക്കുന്നു. ഹമാസിനെ പ്ലാറ്റ്ഫോമുകളില്‍ നിന്ന് നിരോധിക്കുമ്പോള്‍, വാര്‍ത്താ റിപ്പോര്‍ട്ടിംഗ്, മനുഷ്യാവകാശ സംബന്ധമായ പ്രശ്നങ്ങള്‍ അല്ലെങ്കില്‍ അക്കാദമികവും നിഷ്പക്ഷവും വിമര്‍ശനാത്മകവുമായ ചര്‍ച്ചകള്‍ പോലുള്ള സാമൂഹികവും രാഷ്ട്രീയവുമായ ചര്‍ച്ചകള്‍ മെറ്റാ അനുവദിക്കുന്നു. യൂറോപ്യന്‍ കമ്മീഷന്‍ ഡിജിറ്റല്‍ സേവന നിയമത്തിന് (ഡിഎസ്എ) അനുസൃതമായി നിയമവിരുദ്ധവും ഹാനികരവുമായ ഉള്ളടക്കം നീക്കംചെയ്യാന്‍ സോഷ്യല്‍ മീഡിയ പ്ലാറ്റ്ഫോമുകളില്‍ സമ്മര്‍ദ്ദം ചെലുത്തിയിട്ടുണ്ട്, ഇത് ലംഘിക്കുന്നത് കമ്പനികള്‍ക്ക് വലിയ പിഴ ഈടാക്കാന്‍ കാരമാകും.