ഇൻസ്റ്റാഗ്രാം ഉപയോക്താക്കൾക്ക് സന്തോഷിക്കാം; ഇനി ബയോയിൽ അഞ്ച് ലിങ്കുകൾ വരെ നൽകാം

മെറ്റായുടെ ഫൊട്ടൊ ഷെയറിങ് ആപ്ലിക്കേഷനായ ഇൻസ്റ്റാഗ്രാം അടുത്തിടെ പുതിയ ചില ഫീച്ചറുകൾ കൊണ്ടുവന്നിരുന്നു. ഇൻസ്റ്റാഗ്രാം റീലുകൾ സൃഷ്ടിക്കാൻ സഹായിക്കുന്ന രസകരമായ ചില സവിശേഷതകളാണ് പ്രഖ്യാപിച്ചത്. ഇനി, ഇൻസ്റ്റാഗ്രാം ഉപയോക്താക്കൾക്ക് അവരുടെ ബയോയിലേക്ക് 5 ലിങ്കുകൾ വരെ ചേർക്കാൻ കഴിയുമെന്ന് മെറ്റാ സിഇഒ മാർക്ക് സക്കർബർഗ് പ്രഖ്യാപിച്ചു. ഏറ്റവും പുതിയ അപ്‌ഡേറ്റിനൊപ്പം, ലിങ്ക്ട്രീ, ബീക്കൺസ് പോലുള്ള മൂന്നാം കക്ഷി ലിങ്ക്-ഇൻ ബയോ സൊല്യൂഷനുകളും ഇൻസ്റ്റാഗ്രാം ഏറ്റെടുക്കുന്നു.

സക്കർബർഗ് തന്റെ ഇൻസ്റ്റാഗ്രാം ബ്രോഡ്കാസ്റ്റ് ചാനലിലാണ് ഇത് പ്രഖ്യാപിച്ചത്. ഉപയോക്താക്കൾ ഏറ്റവും അധികം അഭ്യർഥിച്ച ഒരു സവിശേഷതയാണിതെന്ന് മെറ്റ സിഇഒ പറയുന്നു.

ഇൻസ്റ്റാഗ്രാം, ടിക്ടോക്ക് പോലുള്ള പ്ലാറ്റ്ഫോമുകൾ ആളുകൾ മറ്റുള്ള ആപ്പുകളിലേക്ക് പോകുന്ന തടയുന്നതിന്റെ ഭാഗമായിട്ടാണ് ലിങ്കുകൾ നൽകുന്നതിനെ തടഞ്ഞിരുന്നത്. എതിരാളികളുടെ ആപ്പിലേക്ക് റീഡയറക്‌ട് ചെയ്യപ്പെടും എന്നതിനാലാണ് ഉപയോക്താക്കളെ ലിങ്ക് ഇടുന്നതിൽനിന്നു ഇൻസ്റ്റാഗ്രാം നിയന്ത്രിച്ചിരുന്നത്. ഇതാണ് ലിങ്ക്ട്രീ പോലുള്ള സേവനങ്ങൾ വർധിച്ചതിന്റെ കാരണം.

ഇൻസ്റ്റാഗ്രാം ബയോയിൽ എങ്ങനെ കൂടുതൽ ലിങ്കുകൾ നൽകാം?

നിങ്ങളുടെ ഇൻസ്റ്റാഗ്രാം ബയോയിൽ ലിങ്കുകൾ നൽകാനായി പ്രൊഫൈൽ പേജിലെ എഡിറ്റ് ഓപ്ഷനിൽ ടാപ്പ് ചെയ്യുക. അതിൽ ലിങ്കുകൾ തിരഞ്ഞെടുക്കുക. ആഡ് എക്സ്റ്റേണൽ എന്ന ഓപ്ഷനിൽ ടാപ്പ് ചെയ്താൽ കൂടുതൽ ലിങ്കുകൾ ആഡ് ചെയ്യാൻ സാധിക്കും. ലിങ്കിന് ഡ്രാഗ് ആൻഡ് ഡ്രാപ്പ് ഓപ്ഷനും ലഭ്യമാണ്. ഇത്തരത്തിൽ അഞ്ച് ലിങ്കുകൾ വരെ നൽകാനാകും.

ബാഹ്യമായ ഇത്തരം ലിങ്കുകൾക്ക് ചെറിയ ഐക്കണുകൾ പോലുള്ള പ്രത്യേക തരത്തിലുള്ള ഓപ്ഷനുകളൊന്നും ഉണ്ടാകില്ല. അവ ഇൻസ്റ്റാഗ്രാം ആപ്പിനുള്ളിൽതന്നെ തുറക്കാൻ സാധിക്കും. ലിങ്ക്ട്രീയിലേക്കോ മറ്റ് സമാന സേവനങ്ങളിലേക്കോ ഉള്ള ലിങ്കുകളൊന്നും തടയില്ലെന്നും മെറ്റാ സ്ഥിരീകരിച്ചു.