പരിചയമില്ലാത്തവരില്‍ നിന്ന് ഇനി സന്ദേശങ്ങള്‍ ലഭിക്കില്ല; പുതിയ സവിശേഷതയുമായി ഇന്‍സ്റ്റാഗ്രാം

പരിചയമില്ലാത്ത വ്യക്തികളില്‍ നിന്ന് ലഭിക്കുന്ന സന്ദേശങ്ങള്‍ക്ക് പൂട്ടിടാന്‍ ഇന്‍സ്റ്റാഗ്രാം. ഇന്‍സ്റ്റാഗ്രാമില്‍ പിന്തുടരാത്ത വ്യക്തികള്‍ക്ക് മെസേജ് റിക്വസ്റ്റുകള്‍ അയക്കാനുള്ളതിന്റെ പരിധി നിശ്ചയിക്കുന്നതാണ് പുതിയ സവിശേഷത. ഇതുകൂടാതെ മെസേജ് റിക്വസ്റ്റില്‍ ചിത്രങ്ങള്‍, വീഡിയോകള്‍, ശബ്ദസന്ദേശങ്ങള്‍ എന്നിവയും അയക്കാനും സാധിക്കില്ല.

കഴിഞ്ഞ ജൂണിലാണ് പുതിയ സവിശേഷത ഇന്‍സ്റ്റാഗ്രാം പരീക്ഷിച്ചത്. പരസ്പരം ഫോളോ ചെയ്യാത്ത ഉപയോക്താക്കള്‍ക്ക് സന്ദേശങ്ങള്‍ അയക്കണമെങ്കില്‍ ഒരു മെസേജ് ഇന്‍വൈറ്റ് മാത്രമെ നല്‍കാനാകു. സന്ദേശത്തില്‍ എഴുത്ത് മാത്രമാണ് അനുവദനീയമായിട്ടുള്ളതും. മെസേജ് റിക്വസ്റ്റ് സ്വീകരിക്കാനും നിഷേധിക്കാനും റിപ്പോര്‍ട്ട് ചെയ്യാനും കഴിയും. ആവശ്യമെങ്കില്‍ ബ്ലോക്കും ചെയ്യാം.

മെസേജ് റിക്വസ്റ്റുകള്‍ സാധാരണ ഇന്‍ബോക്സിനൊപ്പമല്ല ലഭ്യമാകുക. ഇന്‍ബോക്സിന് മുകളിലായി ഇതിനുള്ള ഓപ്ഷനുണ്ടാകും. ആര്‍ക്കൊക്കെ മെസേജ് റിക്വസ്റ്റുകള്‍ അയക്കാമെന്നും നിങ്ങള്‍ക്ക് തന്നെ നിശ്ചയിക്കാനാകും.

സുരക്ഷയുടെ ഭാഗമായാണ് പുതിയ സവിശേഷത മെറ്റ അവതരിപ്പിക്കുന്നത്. ഇന്‍സ്റ്റാഗ്രാമിന് പുറമെ മെസഞ്ചറിലും സവിശേഷതയുണ്ടാകും.