ചന്ദ്രയാന്‍; നാലാം ഭ്രമണപഥം താഴ്ത്തല്‍ പ്രക്രിയ വിജയകരം

ന്യൂഡല്‍ഹി: ഐഎസ്ആര്‍ഒയുടെ ബഹിരാകാശ പേടകം ചന്ദ്രയാന്‍ മൂന്നിന്റെ നാലം ഭ്രമണപഥം താഴ്ത്തല്‍ പ്രക്രിയ വിജയകരം. പേടകം ചന്ദ്രോപരിതലത്തോട് അടുത്തതായി ദേശീയ ബഹിരാകാശ ഏജന്‍സി അറിയിച്ചു. പേടകം ഇപ്പോള്‍ ചന്ദ്രനുചുറ്റും ഒരു വൃത്താകൃതിയിലുള്ള ഭ്രമണപഥത്തില്‍ എത്തിയിരിക്കുന്നു.

ജൂലൈ 14 ന് വിക്ഷേപിച്ചതിന് ശേഷം, രാജ്യത്തിന്റെ അഭിമാനകരമായ മൂന്നാമത്തെ ചാന്ദ്ര ദൗത്യമായ ചന്ദ്രയാന്‍ -3 ഓഗസ്റ്റ് 5 ന് ചാന്ദ്ര ഭ്രമണപഥത്തില്‍ പ്രവേശിച്ചിരുന്നു. തുടര്‍ന്ന് ആഗസ്ത് 6, 9 തീയതികളില്‍ ബഹിരാകാശ പേടകത്തില്‍ രണ്ട് ഭ്രമണപഥം കുറയ്ക്കുന്നതിനുള്ള പ്രവര്‍ത്തനങ്ങള്‍ നടത്തി. . ഇന്ന് പേടകം 150 കിലോമീറ്റര്‍ ഃ 177 കിലോമീറ്റര്‍ വൃത്താകൃതിയിലുള്ള ഭ്രമണപഥത്തിലെത്തി, ''ഐഎസ്ആര്‍ഒ പറഞ്ഞു.

അടുത്ത ഓപ്പറേഷന്‍ ഓഗസ്റ്റ് 16 ന് രാവിലെ 08.30 ന് ആസൂത്രണം ചെയ്തിട്ടുണ്ട്. ദൗത്യം പുരോഗമിക്കുമ്പോള്‍ ചന്ദ്രയാന്‍ -3 ന്റെ ഭ്രമണപഥം ക്രമേണ കുറയ്ക്കാനും ചന്ദ്രധ്രുവങ്ങള്‍ക്ക് മുകളില്‍ സ്ഥാപിക്കാനും ഐഎസ്ആര്‍ഒ നിരവധി ഘട്ടങ്ങള്‍ ഉപയോഗപ്പെടുത്തുന്നു. ഐഎസ്ആര്‍ഒ വൃത്തങ്ങള്‍ പറയുന്നതനുസരിച്ച്, ഓഗസ്റ്റ് 16 ന് പേടകം 100 കിലോമീറ്റര്‍ ഭ്രമണപഥത്തിലെത്താന്‍ ശ്രമം നടത്തും. ഇതേതുടര്‍ന്ന് ലാന്‍ഡറും റോവറും ഉള്‍പ്പെടുന്ന ലാന്‍ഡിംഗ് മൊഡ്യൂള്‍ പ്രൊപ്പല്‍ഷന്‍ മൊഡ്യൂളില്‍ നിന്ന് വേര്‍പെടും. ഇതിനുശേഷം, ലാന്‍ഡര്‍ 'ഡീബൂസ്റ്റ്' (വേഗത കുറയ്ക്കുന്ന പ്രക്രിയ)ക്ക് വിധേയമാകുമെന്നും ഓഗസ്റ്റ് 23 ന് ചന്ദ്രന്റെ ദക്ഷിണ ധ്രുവ മേഖലയില്‍ സോഫ്റ്റ് ലാന്‍ഡിംഗ് നടത്തുമെന്നും പ്രതീക്ഷിക്കുന്നു.