WTC Final: 'ഓവല്‍ വെല്ലുവിളി, ബാറ്റര്‍മാര്‍ ജാഗ്രത പാലിക്കണം'; മുന്നറിയിപ്പുമായി കോഹ്ലി

WTC Final: ലോക ടെസ്റ്റ് ചാമ്പ്യന്‍ഷിപ്പ് ഫൈനലിന് മുന്നോടിയായി ഓവലിലെ സാഹചര്യങ്ങള്‍ മനസിലാക്കുന്നതിന്റെ പ്രാധാന്യം ചൂണ്ടിക്കാണിച്ച് ഇന്ത്യന്‍ ബാറ്റര്‍ വിരാട് കോഹ്ലി.

"ഓവല്‍ വെല്ലുവിളി ഉയര്‍ത്തും. ബാറ്റിങ്ങിന് അനുകൂലമായ വിക്കറ്റ് ലഭിക്കില്ല. അതിനാല്‍ ബാറ്റര്‍മാര്‍ ജാഗ്രത പാലിക്കേണ്ടതുണ്ട്. ഓവലിലെ പിച്ച് എല്ലായ്പ്പോഴത്തെയും രീതിയിലായിരിക്കുമെന്ന് പ്രതീക്ഷിക്കാനാകില്ല. അതിനാല്‍ സാഹചര്യങ്ങള്‍ക്ക് അനുസരിച്ച് കളിക്കാനുള്ള പരിചയം നിങ്ങള്‍ക്കുണ്ടാകണം," കോഹ്ലി സ്റ്റാര്‍ സ്പോര്‍ട്സിനോട് പറഞ്ഞു.

"അതിനാല്‍ സാഹചര്യങ്ങള്‍ മനസിലാക്കി പൊരുത്തപ്പെടണം. ഒരു മത്സരമാണുള്ളത്, സാഹചര്യത്തോട് പൊരുത്തപ്പെടുന്നവര്‍ക്ക് വിജയിക്കാം. ഹോം ഗ്രൗണ്ടിന്റെ ആനുകൂല്യം ഇല്ലാതെ രണ്ട് ടീമുകള്‍, ഇതാണ് ലോക ടെസ്റ്റ് ചാമ്പ്യന്‍ഷിപ്പിന്റെ ഭംഗി," കോഹ്ലി കൂട്ടിച്ചേര്‍ത്തു.

ഓസ്ട്രേലിയയെ അവരുടെ തട്ടകത്തില്‍ രണ്ട് തവണ കീഴടക്കിയതില്‍ പിന്നെ അവരുടെ ബഹുമാനം നേടാന്‍ ഇന്ത്യന്‍ ടീമിനായിട്ടുണ്ട്. ക്രിക്കറ്റിന്റെ ദൈര്‍ഘ്യമേറിയ ഫോര്‍മാറ്റിനെ ലളിതമായ രീതിയില്‍ അല്ല അവര്‍ എടുക്കുന്നതെന്നും കോഹ്ലി പറയുന്നു.

പോയിന്റ് പട്ടികയില്‍ രണ്ടാം സ്ഥാനത്ത് എത്തിയായിരുന്നു ഫൈനലിന് ഇന്ത്യ യോഗ്യത നേടിയത്. 127 പോയിന്റായിരുന്നു ഇന്ത്യയുടെ സമ്പാദ്യം. ശ്രീലങ്ക, ന്യൂസിലന്‍ഡ്, ഓസ്ട്രേലിയ എന്നീ ടീമുകള്‍ക്കെതിരായ വിജയമായിരുന്നു ഇന്ത്യയെ അവസാന രണ്ടിലെത്തിച്ചത്.

നാളെയാണ് ലോക ടെസ്റ്റ് ചാമ്പ്യന്‍ഷിപ്പ് ഫൈനലിന് തുടക്കമാകുന്നത്. ഇന്ത്യന്‍ സമയം വൈകുന്നേരം മൂന്ന് മണിക്കാണ് മത്സരം ആരംഭിക്കുന്നത്.