WTC Final: 'പണം നല്ലതാണ്, പക്ഷെ 100 ടെസ്റ്റുകള്‍ കളിക്കാനാണ് ആഗ്രഹം'; ഐപിഎല്ലിനെക്കുറിച്ച് സ്റ്റാര്‍ക്ക്

WTC Final 2023: അന്താരാഷ്ട്ര കരിയറില്‍ ശ്രദ്ധ കേന്ദ്രീകരിക്കുന്നതിനായി ഏറെ നാളായി ഇന്ത്യന്‍ പ്രീമിയര്‍ ലീഗില്‍ (ഐപിഎല്‍) നിന്ന് വിട്ടു നില്‍ക്കുകയാണ് ഓസ്ട്രേലിയന്‍ പേസ് ബോളറും ലോകകപ്പ് ജേതാവുമായ മിച്ചല്‍ സ്റ്റാര്‍ക്ക്.

"ഓസ്ട്രേലിയക്കായി കളിക്കുന്നതിനായി ചില കാര്യങ്ങള്‍ ഉപേക്ഷിക്കാന്‍ തീരുമാനിച്ചു," സ്റ്റാര്‍ക്ക് വ്യക്തമാക്കി. റോയല്‍ ചലഞ്ചേഴ്സ് ബാംഗ്ലൂര്‍ താരമായിരുന്ന സ്റ്റാര്‍ക്ക് രണ്ട് സീസണുകള്‍ മാത്രമായിരുന്നു ടീമിനായി കളിച്ചത്.

"പണം നല്ല കാര്യമാണ്, പക്ഷെ 100 ടെസ്റ്റ് മത്സരങ്ങള്‍ കളിക്കാന്‍ ഞാന്‍ ആഗ്രഹിക്കുന്നു. അത് സാധിക്കുമോ ഇല്ലയോ എന്ന് അറിയില്ല. സാധ്യമയാല്‍ അത് നല്ലൊരു കാര്യമായിരിക്കും," സ്റ്റാര്‍ക്ക് കൂട്ടിച്ചേര്‍ത്തു.

2011-ല്‍ അരങ്ങേറിയ സ്റ്റാര്‍ക്ക് 77 ടെസ്റ്റുകളില്‍ നിന്ന് 306 വിക്കറ്റുകള്‍ നേടി. 27.52 ആണ് സ്റ്റാര്‍ക്കിന്റെ ശരാശരി. 110 ഏകദിനങ്ങളും 58 ട്വന്റി 20-കളും സ്റ്റാര്‍ക്ക് കളിച്ചു. ഏകദിനത്തില്‍ 219 വിക്കറ്റും ട്വന്റി 20-യില്‍ 73 വിക്കറ്റുമാണ് സ്റ്റാര്ക്ക് നേടിയത്.

"മൂന്ന് ഫോര്‍മാറ്റുകളും 10 വര്‍ഷത്തിലധികം കളിക്കുക എന്നത് അല്‍പ്പം കഠിനമാണ്, എന്നാല്‍ എനിക്കത് സാധിച്ചു," സ്റ്റാര്‍ക്ക് പറഞ്ഞു. കഴിഞ്ഞ കുറച്ച് വര്‍ഷങ്ങളായി മോശം ഫോമില്‍ തുടരുന്ന സ്റ്റാര്‍ക്കിന്റെ ഓസ്ട്രേലിയന്‍ ടീമിലെ സ്ഥാനം വരെ ചോദ്യം ചെയ്യപ്പെട്ടിരുന്നു.

മാധ്യമങ്ങളുടെ വിമര്‍ശനങ്ങള്‍ കുറച്ച് വര്‍ഷങ്ങള്‍ക്ക് മുന്‍പ് എന്നെ ബാധിച്ചിരുന്നു. എന്നാല്‍ ഇപ്പോള്‍ അത് എന്നെ ബാധിക്കാറെ ഇല്ല, ഇടം കയ്യന്‍ പേസര്‍ പറഞ്ഞു.

ലോക ടെസ്റ്റ് ചാമ്പ്യന്‍ഷിപ്പ് ഫൈനലിനായുള്ള തയാറെടുപ്പിലാണ് സ്റ്റാര്‍ക്ക് നിലവില്‍. നാളെ ആരംഭിക്കുന്ന ഫൈനലില്‍ ഇന്ത്യയാണ് ഓസ്ട്രേലിയയുടെ എതിരാളികള്‍.