WTC Final: 'ടെസ്റ്റ് ചാമ്പ്യന്‍ഷിപ്പ് ഫൈനലില്‍ രഹാനെ നിര്‍ണായകമാകും'; താരത്തെ പുകഴ്ത്തി ഗവാസ്കര്‍

WTC Final 2023: 15 മാസത്തെ ഇടവേളയ്ക്ക് ശേഷം ഇന്ത്യയുടെ ടെസ്റ്റ് ടീമിലേക്ക് മടങ്ങിയ എത്തിയ അജിങ്ക്യ രഹാനെയ്ക്ക് ലോക ടെസ്റ്റ് ചാമ്പ്യന്‍ഷിപ്പ് ഫൈനലില്‍ ഓസ്ട്രേലിയക്കെതിരെ വലിയ സ്വാധീനം ചെലുത്താനാകുമെന്ന് മുന്‍ താരം സുനില്‍ ഗവാസ്കര്‍. ജൂണ്‍ ഏഴാം തീയതിയാണ് ഫൈനല്‍ ആരംഭിക്കുന്നത്.

ഈ വര്‍ഷം ആഭ്യന്തര ക്രിക്കറ്റില്‍ മികവ് പുലര്‍ത്താന്‍ രഹാനെക്ക് കഴിഞ്ഞിരുന്നു. ഐപിഎല്ലില്‍ ചെന്നൈ സൂപ്പര്‍ കിങ്സിനായും രഹാനെ തിളങ്ങി. ചെന്നൈയെ കിരീടത്തിലെത്തിച്ചതില്‍ താരം നിര്‍ണായക പങ്കുവഹിച്ചിരുന്നു.

രഹാനെയുടെ ജീവിതത്തില്‍ ഇനിയും ക്രിക്കറ്റ് ബാക്കിയുണ്ടെന്നും ടെസ്റ്റ് ചാമ്പ്യന്‍ഷിപ്പ് ഫൈനലില്‍ താരത്തിന് തെളിയിക്കാന്‍ അവസരം ഒരുങ്ങുകയാണെന്നും ഗവാസ്കര്‍ പറഞ്ഞു.

ഇംഗ്ലണ്ടില്‍ കളിച്ച പരിചയസമ്പത്ത് രഹാനെയ്ക്കുണ്ട്. ഇംഗ്ലണ്ടില്‍ രഹാനെയ്ക്ക് റണ്‍സും നേടാനായിട്ടുണ്ട്. അഞ്ചാം സ്ഥാനത്ത് ബാറ്റിങ്ങിനിറങ്ങുന്ന രഹാനെയ്ക്ക് ഇന്നിങ്സില്‍ നിര്‍ണായക പങ്ക് വഹിക്കാനാകും. ഇത് രഹാനെയ്ക്ക് മുന്നിലെത്തിയ സുവര്‍ണാവസരമാണ്, ഗവാസ്കര്‍ വ്യക്തമാക്കി.

ഈ അവസരം അദ്ദേഹം ഉപയോഗിക്കുമെന്നാണ് എന്റെ പ്രതീക്ഷയെന്നും മുന്‍താരം കൂട്ടിച്ചേര്‍ത്തു. ഐപിഎല്‍ കഴിഞ്ഞ് എത്തുന്നതിനാല്‍ ടെസ്റ്റ് ചാമ്പ്യന്‍ഷിപ്പ് ഫൈനലിനായി ഇന്ത്യ മതിയായ തയാറെടുപ്പിലല്ലെന്നും ഗവാസ്കര്‍ പറഞ്ഞു. കൗണ്ടി ക്രിക്കറ്റ് കളിച്ച് വന്ന ചേതേശ്വര്‍ പൂജാര ഒഴികെയുള്ള താരങ്ങള്‍ സാഹചര്യങ്ങള്‍ അനുസരിച്ച് കളിക്കേണ്ടി വരുമെന്നും ഗവാസ്കര്‍ അഭിപ്രായപ്പെട്ടു.