നിദാഹാസ്​ ത്രിരാഷ്​ട്ര ട്വൻറി20 ഫൈനലിലേക്ക്​ പ്രവേശിക്കുന്നതിന്​ മുമ്പ്​ ഫൈനലിലേക്കുള്ള കാർ പാസുകൾ വിതരണം ചെയ്​ത് നാണംകെട്ട് ലങ്കന്‍ ക്രിക്കറ്റ് ബോര്‍ഡ്. പാസുകളിലും പരസ്യ ബോർഡുകളിലും മറ്റുമായി നൽകിയ വിവരങ്ങളിൽ ഫൈനലിൽ മാറ്റുരക്കുന്ന ടീമുകൾ ഇന്ത്യയും ശ്രീലങ്കയും എന്നാണ് അച്ചടിച്ചിരിക്കുന്നത്. സെമി ഫൈനലില്‍ ലങ്കയെ മറികടക്കാന്‍ ബംഗ്ലാ കടുവകള്‍ക്ക് ആവില്ലെന്ന മുന്‍വിധിയാണ് ബോര്‍ഡിനെ നാണം കെടുത്തിയത്.

മാർച്ച്​ 18ന്​ നടക്കുന്ന ഫൈനലിൽ ഇന്ത്യയും ശ്രീലങ്കയും ഏറ്റുമുട്ടുമെന്നാണ്​ പാസുകളിൽ ഉള്ളത്​. ഇതിന്റെ ചിത്രങ്ങള്‍ സോഷ്യല്‍മീഡിയയില്‍ വൈറലായി മാറി. ബംഗ്ലാദേശ് മുന്‍ നായകന്‍ നൈമൂര്‍ റഹ്മാന്‍ അടക്കമുളളവര്‍ ചിത്രം ഷെയര്‍ ചെയ്തിട്ടുണ്ട്. സംഭവത്തില്‍ പ്രതികരിക്കാന്‍ ലങ്കന്‍ ക്രിക്കറ്റ് ബോര്‍ഡ് തയ്യാറായിട്ടില്ല.

ലങ്കയുടെ 70ാം സ്വാതന്ത്ര്യ ദിനാ​ഘോഷത്തി​​​ന്റെ ഭാഗമായി നടത്തിയ ടൂർണമ​​െൻറാണ്​ നിദാഹാസ്​. നാടകീയമായ നിമിഷങ്ങളിലൂടെ കടന്നുപോയ സെമിയിൽ ബംഗ്ലാദേശുമായി ദയനീയ പരാജയമാണ്​ ലങ്ക ഏറ്റുവാങ്ങിയത്​. ഇന്നലെ നടന്ന അവസാന മൽസരത്തിൽ ആതിഥേയരായ ശ്രീലങ്കയെ തോൽപ്പിച്ചാണ് ബംഗ്ലാദേശിന്റെ ചുണക്കുട്ടികൾ ഫൈനൽ ബർത്ത് ഉറപ്പിച്ചത്. ആവേശപ്പോരാട്ടത്തിൽ 2 വിക്കറ്റിനാണ് ബംഗ്ലാദേശ് ലങ്കയെ തകർത്തത്.

ആദ്യം ബാറ്റു ചെയ്ത ശ്രീലങ്ക 160 റൺസാണ് നേടിയത്. അർധസെഞ്ചുറി നേടിയ കുശാൽ പെരേരയും (61) തിസാര പെരേരയുമാണ് (58) ശ്രീലങ്കയ്ക്ക് പൊരുതാനുളള​ സ്കോർ സമ്മാനിച്ചത്.

മറുപടി ബാറ്റിങ്ങിന് ഇറങ്ങിയ ബംഗ്ലാദേശിന് ഓപ്പണർ തമിം ഇക്ബാൽ (50), മഹ്മൂദുല്ല (43) എന്നിവരുടെ പ്രകടനങ്ങളാണ് സ്വപ്‌നവിജയം സമ്മാനിച്ചത്. ഒരു പന്ത് ബാക്കിനിൽക്കെയാണ് ബംഗ്ലാദേശ് വിജയലക്ഷ്യം മറികടന്നത്. ഞായറാഴ്ചയാണ് ഇന്ത്യ-ബംഗ്ലദേശ് ഫൈനൽ പോരാട്ടം.

Get all the Latest Malayalam News and Kerala News at Indian Express Malayalam. You can also catch all the Sports News in Malayalam by following us on Twitter and Facebook