'ഐപിഎല്ലിനേക്കാള്‍ ആവേശം ഒരു വിഭാഗത്തിന് സമ്മാനിക്കാന്‍ വനിത പ്രീമിയര്‍ ലീഗിനായി'

വനിത പ്രീമിയറിന്റെ (ഡബ്ല്യുപിഎല്‍) ആദ്യ സീസണിന് ഗംഭീര വരവേല്‍പ്പ് ലഭിച്ചു എന്നതില്‍ ആര്‍ക്കും തര്‍ക്കമുണ്ടാകില്ല. ഐപിഎല്ലിനേക്കാള്‍ ആവേശത്തോടെ വനിത പ്രീമിയര്‍ ലീഗ് സ്വീകരിച്ചവരുമുണ്ടായിരുന്നെന്ന് അഭിപ്രായപ്പെട്ടിരിക്കുകയാണ് ഇന്ത്യന്‍ ടീം ക്യാപ്റ്റന്‍ ഹര്‍മന്‍പ്രീത് കൗര്‍.

ഡബ്ല്യുപിഎല്‍ ഒരു ഗെയിം ചേഞ്ചറായിരുന്നു. ടൂര്‍ണമെന്റിന് വലിയ സ്വീകാര്യത ലഭിച്ചു. ഞങ്ങള്‍ക്ക് ലഭിച്ച പ്രതികരണം ഐപിഎല്ലിനേക്കാള്‍ മികച്ചതായിരുന്നു, കാരണം കാണികള്‍ക്ക് പുതുമ നല്‍കുന്ന ഒന്നായിരുന്നു ഡബ്ല്യുപിഎല്‍. ഭാവിയില്‍ കൂടുതല്‍ ടീമുകള്‍ ലീഗിലേക്ക് വരുമെന്നാണ് പ്രതീക്ഷിക്കുന്നത്. എപ്പോള്‍ സംഭവിക്കുമെന്ന് എനിക്ക് കൃത്യമായി പറയാനാകില്ല, പക്ഷെ സംഭവിക്കും. കഴിവുള്ള നിരവധി പെണ്‍കുട്ടികള്‍ക്ക് ഡബ്ല്യുപിഎല്‍ മികച്ച അവസരമാണ്, ഹര്‍മന്‍പ്രീത് ഡാഗേഴ്സ് ആന്‍ഡ് ലൈഡ്സ് പോഡ്കാസ്റ്റിനോട് വ്യക്തമാക്കി.

ഇന്ത്യക്ക് പുറത്തുള്ള ലീഗുകളില്‍ കളിച്ച പരിചയസമ്പത്തിനെക്കുറിച്ചും ഹര്‍മന്‍പ്രീത് പങ്കുവച്ചു. വനിത ബിഗ് ബാഷ് ലീഗില്‍ ആദ്യമായി കളിക്കാന്‍ അവസരം ലഭിച്ചത് വ്യത്യസ്തമായ അനുഭവമായിരുന്നു. കാരണം അതിന് മുന്‍പ് ഞങ്ങള്‍ ആഭ്യന്തര ക്രിക്കറ്റില്‍ മാത്രമായിരുന്നു സജീവമായിരുന്നത്. അവിടെ വിദേശ താരങ്ങളില്ലല്ലൊ. പിന്നീട് ഞാന്‍ കെഐഎ ലീഗിന്റെ ഭാഗമായി. നിരവധി ഇംഗ്ലണ്ട് താരങ്ങള്‍ക്കൊപ്പം കളിക്കാനായി. ഇത്തരം അവസരങ്ങള്‍ ഒരു താരത്തിന് ലഭിക്കണം, ഹര്‍മന്‍പ്രീത് കൂട്ടിച്ചേര്‍ത്തു.

വനിത പ്രീമിയര്‍ ലീഗിന്റെ പ്രഥമ സീസണില്‍ ഹര്‍മന്‍പ്രീത് നയിച്ച മുംബൈ ഇന്ത്യന്‍സായിരുന്നു കിരീടം സ്വന്തമാക്കിയത്.