രാജസ്ഥാനെതിരെ ഷെയ്ന്‍ വാട്‌സണിന്റെ വെടിക്കെട്ട് ബാറ്റിംഗിന്റെ കരുത്തില്‍ ചെന്നൈ. 51 പന്തില്‍ നിന്നും സെഞ്ച്വറി നേടിയാണ് വാട്‌സണ്‍ പൂനെയിലേക്കുള്ള ചെന്നൈയുടെ ഗൃഹപ്രവേശം ആഘോഷിച്ചത്. ഒമ്പത് ഫോറും ആറ് സിക്‌സും അടങ്ങുന്നതാണ് വാട്‌സണിന്റെ ഇന്നിംഗ്‌സ്. 57 പന്തില്‍ നിന്നും 106 റണ്‍സെടുത്താണ് വാട്സണ്‍ പുറത്തായത്. വാട്സണിന്‍റെ ഏറ്റവും ഉയർന്ന ഐപിഎല്‍ സ്കോറാണിത്.

നേരിട്ട ആദ്യ പന്തുമുതല്‍ ആക്രമിച്ചു കളിക്കുക എന്ന ശൈലിയാണ് വാട്‌സണ്‍ പിന്തുടര്‍ന്നിരിക്കുന്നത്. അതേസമയം, ഓപ്പണര്‍ അമ്പാട്ടി റായിഡു 12 റണ്‍സെടുത്ത് കൂടാരം കണ്ടപ്പോള്‍ സുരേഷ് റെയ്‌ന 46 റണ്‍സുമായി വാട്‌സണിന് മികച്ച പിന്തുണ നല്‍കി. ഒമ്പത് ഫോറുകള്‍ അടങ്ങുന്നതായിരുന്നു റെയ്‌നയുടെ ഇന്നിംഗ്‌സ്. വാട്സണിന്‍റെ സെഞ്ച്വറിയുടെ കരുത്തില്‍ ചെന്നെ 20 ഓവറില്‍ 204 റണ്‍സ് നേടി.

അതേസമയം, പരിക്കിന്റെ പിടിയിലുള്ള നായകന്‍ എംഎസ് ധോണി അഞ്ച് റണ്‍സെടുത്തു പുറത്തായി. പിന്നാലെ വന്ന ബില്ലിംഗ്‌സും രണ്ടക്കം കാണാതെ പുറത്തായെങ്കിലും വാട്‌സണ്‍ ഒരറ്റത്ത് നിലയുറപ്പിച്ച് ബാറ്റ് ചെയ്തതോടെ ചെന്നൈ മികച്ച സ്‌കോറിലേക്ക് കുതിക്കുകയായിരുന്നു. ഇന്നലെ സൂപ്പർ താരം ക്രിസ് ഗെയിലിന്‍റെ സെഞ്ച്വറിയ്ക്ക് പിന്നാലെയാണ് ഐപിഎല്ലില്‍ മറ്റൊരു സെഞ്ച്വറി പിറക്കുന്നത്.

Get all the Latest Malayalam News and Kerala News at Indian Express Malayalam. You can also catch all the Sports News in Malayalam by following us on Twitter and Facebook