ഷൈന്‍ ചെയ്യാന്‍ ഷൈലി; ഈ വര്‍ഷം തന്നെ അഞ്ജു ബോബി ജോര്‍ജിന്റെ റെക്കോര്‍ഡ് തകര്‍ക്കാന്‍ താരം

പ്രായം വെറും 19 വയസ് മാത്രം, സീനിയര്‍ നിരയിലെത്തിയിട്ട് കേവലം രണ്ട് വര്‍ഷവും. ഇതിനോടകം തന്നെ ഇന്ത്യയിലെ ഏറ്റവും മികച്ച വനിതാ ലോങ് ജമ്പറായിരിക്കുകയാണ് ഷൈലി സിങ്. തന്റെ ഉപദേശകയും മലയാളി താരവുമായ അഞ്ജു ബോബി ജോര്‍ജിന്റെ റെക്കോര്‍ഡ് തകര്‍ക്കുക എന്ന ലക്ഷ്യമാണ് ഷൈലിക്കുള്ളത്.

ഏപ്രിലില്‍ 6.76 മീറ്റര്‍ ദൂരമാണ് ഷൈലി ചാടിയത്. ഇന്ത്യന്‍ വനിതകളില്‍ രണ്ടാമത്തെ മികച്ച ചാട്ടവും ഇതാണ്. 6.83 മീറ്റര്‍ ചാടിയ അഞ്ജു ബോബി ജോര്‍ജിന്റെ പേരിലാണ് റെക്കോര്‍ഡ് നിലവില്‍.

19 വര്‍ഷമായി ആരാലും തകര്‍ക്കാനാകാത്ത തന്റെ ദേശിയ റെക്കോര്‍ഡ് മറികടക്കാന്‍ ഷൈലിക്ക് കഴിയുമെന്നാണ് അഞ്ജുവും വിശ്വസിക്കുന്നത്.

"അഞ്ജു മാഡം അവരുടെ റെക്കോര്‍ഡ് എനിക്ക് മറികടക്കാനാകുമെന്നാണ് പറയുന്നത്. അത് ഈ വര്‍ഷം തന്നെ സാധ്യമാകാനും അവര്‍ ആഗ്രഹിക്കുന്നു," ഷൈലി പറഞ്ഞു. നാഷണല്‍ ഇന്റര്‍ സ്റ്റേറ്റ് അത്ലറ്റിക്സ് ചാമ്പ്യന്‍ഷിപ്പ് യോഗ്യത റൗണ്ടിന് ശേഷമായിരുന്നു ഷൈലിയുടെ പ്രതികരണം.

മലയാളി താരങ്ങളായ ആന്‍സി സോജനും നയനാ ജെയിംസിനും പിന്നിലായാണ് ഷൈലി ഫിനിഷ് ചെയ്തത്. 6.27 മീറ്ററാണ് ഷൈലി കൈവരിച്ച് ദൂരം. ആന്‍സി 6.49 മീറ്ററും നയന 6.31 മീറ്ററും ചാടി.

"പരുക്ക് മൂലം എനിക്ക് ഒരു മാസം ഈ വര്‍ഷം നഷ്ടമായിരുന്നു. എന്നാല്‍ ഇപ്പോള്‍ മെച്ചപ്പെട്ട് വരുന്നുണ്ട്. 6.70 മുതല്‍ 6.80 മീറ്റര്‍ വരെ ചാടാന്‍ കഴിയുമെന്നാണ് പ്രതീക്ഷിക്കുന്നത്," ആന്‍സി വ്യക്തമാക്കി.

ഫൈനലില്‍ മെച്ചപ്പെട്ട പ്രകടനം കാഴ്ചവയ്ക്കാമെന്ന പ്രതീക്ഷയിലാണ് ഷൈലി.