ജപ്പാൻ ഓപ്പൺ സീരിസ്: സൈനയ്ക്കും, സിന്ധുവിനും, ശ്രീകാന്തിനും വിജയത്തുടക്കം

ടോക്കിയോ: ജപ്പാൻ ഓപ്പൺ സീരിയസിൽ വിജയത്തുടക്കവുമായി ഇന്ത്യൻ താരങ്ങൾ. വനിത സിംഗിൾസിൽ സൈന നെഹ്‌വാളും,പി.വി സിന്ധുവും, പുരുഷ സിംഗിൾസിൽ കിടാംമ്പി ശ്രീകാന്തും ആദ്യ റൗണ്ട് മത്സരങ്ങളിൽ വിജയിച്ചു.

തായ്‌ലൻഡ് താരം ചോച്ചുവോങ്ങിനെതിരെ നേരിട്ടുള്ള സെറ്റുകൾക്കായിരുന്നു സൈനയുടെ വിജയം. ആദ്യ സെറ്റ് 21-17 എന്ന സ്കോറിന് സ്വന്തമാക്കിയ സൈന രണ്ടാം സെറ്റ് 21-9 എന്ന സ്കോറിനാണ് നേടിയത്. രണ്ടാം റൗണ്ടിൽ ഒളിമ്പിക് സ്വർണ്ണ മെഡൽ ജേതാവായ കരോലിന മാരിനാണ് സൈനയുടെ എതിരാളി.

ചൈനീസ് താരം ടിയാൻ ഹൊവായിയുടെ കടുത്ത വെല്ലുവിളി അതിജീവിച്ചാണ് കിടാംമ്പി ശ്രീകാന്ത് ആദ്യ കടമ്പ കടന്നത്. മൂന്ന് സെറ്റ് നീണ്ട വാശിയേറിയ പോരാട്ടത്തിനൊടുവിലാണ് ശ്രീകാന്തിന്റെ വിജയം. സ്കോർ 21-15,12-21,21-11.

ജപ്പാനീസ് താരം മിനാത്സു മിതാനിയെ മൂന്ന് സെറ്റ് നീണ്ട പോരാട്ടത്തിനൊടുവിലാണ് പി.വി സിന്ധു തോൽപ്പിച്ചത്. ആദ്യ സെറ്റ് നഷ്ടമായതിന് ശേഷം ശക്തമായി തിരിച്ചടിച്ചാണ് സിന്ധു വിജയം നേടിയത്. സ്കോർ 12-21,21-15,21-17.