ദേശീയ സീനിയർ ബാഡ്മിന്റൺ ചാമ്പ്യൻഷിപ്പിന്റെ വനിത സിംഗിൾസ് ഫൈനലിൽ പി.വി സിന്ധുവിനെ തോൽപ്പിച്ച് സൈന നെഹ്‌വാളിന് കിരീടം. വാശിയേറിയ പോരാട്ടത്തിൽ നേരിട്ടുള്ള സെറ്റുകൾക്കായിരുന്നു സൈന നെഹ്‍വാൾ പിവി സിന്ധുവിനെ തോൽപ്പിച്ചത്. സ്കോർ 21-17, 27-25
പി.വി സിന്ധുവിന്റെ ഉയരക്കൂടുതലിനെ സൈന തന്റെ വേഗതകൊണ്ടാണ് മറികടന്നത്. ആക്രമണ ശൈലിയിൽ കളിച്ച സൈന ആദ്യ ഗെയിം 21-17 എന്ന സ്കോറിനാണ് സ്വന്തമാക്കിയത്.
രണ്ടാം ഗെയിമില്‍ 17-13നു സൈന ലീഡ് ചെയ്തുവെങ്കിലും സിന്ധു ലീഡ് കുറച്ച് 19-19നു ഒപ്പമെത്തി. പിന്നീട് ഒരോ തവണ സൈന മാച്ച് പോയിന്റ് നേടുമ്പോളും സിന്ധു അത് രക്ഷിക്കുന്ന കാഴ്ചയാണ് കണ്ടത്. രണ്ടാം ഗെയിമില്‍ 6 മാച്ച് പോയിന്റുകള്‍ നേടിയെങ്കിലും അഞ്ചെണ്ണം സിന്ധു രക്ഷിച്ചു. എന്നാല്‍ ആറാം അവസരം മുതലാക്കി സൈന 21-17, 27-25 എന്ന സ്കോറിനു ജയം സ്വന്തമാക്കി.
നേരത്തെ പുരുഷ സിംഗിൾസ് ഫൈനലിൽ കിഡംമ്പി ശ്രീകാന്തിനെ തോൽപ്പിച്ച് എച്ച്. എസ് പ്രണോയ് കിരീടം സ്വന്തമാക്കി. മൂന്ന് സെറ്റ് നീണ്ട വാശിയേറിയ പോരാട്ടത്തിനൊടുവിലാണ് പ്രണോയിയുടെ വിജയം. സ്കോർ 21-15, 16-21, 21-7.
Get Malayalam News and latest news update from India and around the world. Stay updated with today's latest Sports news in Malayalam at Indian Expresss Malayalam.
ഏറ്റവും പുതിയ വാർത്തകൾക്കും വിശകലനങ്ങൾക്കും ഞങ്ങളെ ഫെയ്സ്ബുക്കിലും ട്വിറ്ററിലും ലൈക്ക് ചെയ്യൂ
