ലണ്ടന്‍: വിംബിള്‍ഡണില്‍ അപ്രതീക്ഷിത തോല്‍വി. സ്വിസ് ഇതിഹാസം റോജര്‍ ഫെഡററാണ് സെമി കാണാതെ പുറത്തായിരിക്കുന്നത്. ക്വാര്‍ട്ടറില്‍ ദക്ഷിണാഫ്രിക്കകാരനായ കെവിന്‍ ആന്‍ഡേഴ്‌സനാണ് ഫെഡററെ പരാജയപ്പെടുത്തിയത്. അഞ്ച് സെറ്റ് നീണ്ട പോരാട്ടത്തിന് ഒടുവിലായിരുന്നു ഫെഡററുടെ പരാജയം. സ്‌കോര്‍ 6-2 7-5 5-7 4-6 11-13.

ആദ്യ രണ്ട് സെറ്റും ഫെഡറര്‍ അനായാസം നേടിയിരുന്നു. മൂന്നാം സെറ്റില്‍ തന്നെ മത്സരം ഫെഡറര്‍ സ്വന്തമാക്കേണ്ടതായിരുന്നു. എന്നാല്‍ മൂന്ന് മാച്ച് പോയിന്റ് കയ്യിലിരിക്കെ ഫെഡറര്‍ സെറ്റ് നഷ്ടപ്പെടുത്തി. മൂന്നാം സെറ്റ് 5-7ന് ആന്‍ഡേഴ്‌സണ്‍ നേടുകയായിരുന്നു. തുടര്‍ച്ചയായി 34 സെറ്റുകള്‍ വിജയിച്ച ശേഷമാണ് ഫെഡറര്‍ക്ക് വിംബിള്‍ഡണില്‍ ഒരു സെറ്റ് വിട്ടുകൊടുക്കുന്നത്. നാലാം സെറ്റില്‍ ഫെഡററുടെ ഒരു സര്‍വീസ് ബ്രേക്ക് ചെയ്ത് 4-6ന് ദക്ഷിണാഫ്രിക്കകാരന്‍ സെറ്റ് സ്വന്തമാക്കി.

അവസാന സെറ്റില്‍ ഇരുവരും ഒപ്പത്തിനൊപ്പം നീങ്ങി. പരസ്പരം സെര്‍വ് ബ്രേക്ക് ചെയ്യാന്‍ അവസരം നല്‍കിയതുമില്ല. ആന്‍ഡേഴ്സണ്‍ സെര്‍വിനൊരുങ്ങുമ്പോള്‍ ഫെഡറര്‍ 6-5ന് മുന്നില്‍. ഗെയിമിലെ ആദ്യ രണ്ട് സെര്‍വും ബ്രേക്ക് ചെയ്ത് ഫെഡറര്‍ 30-0ന് മുന്നില്‍. പിന്നാലെ ആന്‍ഡേഴ്സണ്‍ ഒപ്പമെത്തി 30-30. വൈകാതെ ഗെയിമും ആന്‍ഡേഴ്സണ്‍ സ്വന്തമാക്കി. സ്‌കോര്‍ 6-6.

അധികം വൈകാതെ 11-11. എന്നാല്‍ ഫെഡററുടെ അടുത്ത് സെര്‍വ് ബ്രേക്ക് ചെയ്ത ആന്‍ഡേഴ്സണ്‍ സ്‌കോര്‍ 11-12ലേക്ക് ഉയര്‍ത്തി. പിന്നാലെ സ്വന്തം സെര്‍വ് ലക്ഷ്യത്തിലെത്തിച്ചതോടെ മത്സരം വിജയിച്ച് ആന്‍ഡേഴ്സണ്‍ മത്സരം സ്വന്തമാക്കി. വിംബിള്‍ഡണ്‍ നിലവിലെ ചാംപ്യനാണ് റോജര്‍ ഫെഡറര്‍.

Get all the Latest Malayalam News and Kerala News at Indian Express Malayalam. You can also catch all the Latest News in Malayalam by following us on Twitter and Facebook