ധോണിയേയും യുവരാജിനേയും പോലെ ഫിനിഷറുടെ റോളില്‍ തിളങ്ങാന്‍ റിങ്കുവിനാകും: കിരണ്‍ മോറെ

ധോണിയേയും യുവരാജ് സിങ്ങിനേയും പോലെ മികച്ച ഫിനിഷറാകാന്‍ യുവതാരം റിങ്കു സിങ്ങിന് സാധിക്കുമെന്ന് മുന്‍ ഇന്ത്യന്‍ വിക്കറ്റ് കീപ്പര്‍ കിരണ്‍ മോറെ.

"റിങ്കുവിന് ഇന്ത്യന്‍ ടീമില്‍ അവസരം ലഭിക്കുന്നതിനായി കാത്തിരിക്കുകയായിരുന്നു ഞാന്‍. അഞ്ച്, ആറ് സ്ഥാനങ്ങളില്‍ റിങ്കുവിന് തിളങ്ങാനാകും. നമ്മള്‍ ധോണിയേയും യുവരാജിനേയും കണ്ടിട്ടുണ്ട്. അവര്‍ക്ക് ശേഷം അവരെ പോലെ ഒരാളെ കണ്ടെത്താന്‍ നമുക്കായിട്ടില്ല, റിങ്കുവിന് അതിന് കഴിഞ്ഞേക്കും," കിരണ്‍ വ്യക്തമാക്കി.

"അവരെ പോലുള്ള താരങ്ങളെ സൃഷ്ടിക്കാനാണ് നാം ശ്രമിച്ചത്, പക്ഷെ അത് പരാജയപ്പെട്ടു. തിലക് വര്‍മയ്ക്കും ഫിനിഷറിന്റെ റോള്‍ നിര്‍വഹിക്കാനാകും. റിങ്കു ഒരു നല്ല ഫീല്‍ഡര്‍ കൂടിയണ്. ആഭ്യന്തര ക്രിക്കറ്റില്‍ റിങ്കുവിന്റെ പ്രകടനം ഞാന്‍ നിരീക്ഷിച്ചിട്ടുണ്ട്. റിങ്കുവിന് ഒരുപാട് മാറ്റം സംഭവിച്ചിട്ടുണ്ട്," കിരണ്‍ കൂട്ടിച്ചേര്‍ത്തു.

റിങ്കു ഭാഗമായിട്ടുള്ള കൊല്‍ക്കത്ത നൈറ്റ് റൈഡേഴ്സിന്റെ പരിശീലകരിലൊരാളായ അഭിഷേക് നായറും താരത്തെക്കുറിച്ചുള്ള നിരീക്ഷണങ്ങള്‍ പങ്കുവച്ചു.

"ഹാര്‍ദിക് പാണ്ഡ്യ മുന്‍നിരയില്‍ ബാറ്റ് ചെയ്യുന്നതിനായി ശ്രമിക്കാന്‍ ആരംഭിച്ച പശ്ചാത്തലത്തില്‍ ഫിനിഷറായി ഒരാള്‍ തീര്‍ച്ചയായും ആവശ്യമാണ്. അക്സര്‍ പട്ടേലിനെ പോലുള്ള താരങ്ങളുണ്ടെങ്കിലും റിങ്കുവാണ് ഏറ്റവും അനുയോജ്യന്‍," അഭിഷേക് പറഞ്ഞു.

"ഫിനിഷറുടെ റോളില്‍ ഇന്ത്യ അവസാനമായി ഉപയോഗിച്ച താരം ദിനേഷ് കാര്‍ത്തിക്കാണ്. ഹാര്‍ദിക്കും ഫിനിഷറായി തിളങ്ങിയിട്ടുണ്ട്. എന്നാല്‍ ഉത്തരവാദിത്തത്തോടെ ബാറ്റ് ചെയ്യേണ്ട ഒരു ടോപ് ഓര്‍ഡര്‍ ബാറ്ററായി ഹാര്‍ദിക് നിലവില്‍ മാറിയിട്ടുണ്ട്. അതിനാല്‍ തന്നെയാണ് റിങ്കുവിനെ ഞാന്‍ ഉറ്റുനോക്കുന്നത്," അഭിഷേക് വ്യക്തമാക്കി.