'എന്‍റെ സ്വപ്നത്തിനപ്പുറം': പ്രായം കൂടിയ ഒന്നാം നമ്പര്‍ ടെന്നീസ് താരമായി ഫെഡറര്‍

പുരുഷ ടെന്നീസിലെ പ്രായം കൂടിയ ഒന്നാം നമ്പര്‍ താരമായി റോജര്‍ ഫെഡറര്‍. റാഫേല്‍ നദാലിനെ മറികടന്നാണ് ഫെഡറര്‍ നേട്ടം കൈവരിച്ചത്.36ആം വയസിലാണ് താരത്തിന്റെ നേട്ടം. ലോക ടെന്നീസ് ടൂര്‍ണമെന്റിന്റെ ക്വാര്‍ട്ടര്‍ ഫൈനലില്‍ റോബിന്‍ ഹാസെയെ പരാജയപ്പെടുത്തിയാണ് ഫെഡറര്‍ ഒന്നാം സ്ഥാനത്തെത്തിയത്.

2016ല്‍ കാല്‍മുട്ടിനേറ്റ പരുക്ക് മൂലം പകുതി സീസണ്‍ നഷ്ടമായപ്പോള്‍ ആരാധകര്‍ പോലും കരുതിയിരുന്നില്ല ഫെഡറര്‍ ഒന്നാം സ്ഥാനത്തേക്ക് വീണ്ടും എത്തുമെന്ന്. റോട്ടര്‍ഡാമില്‍ നടന്ന എബിഎന്‍ എഎംആര്‍ഒ ടൂര്‍ണമെന്റില്‍ ഡച്ച് താരം റോബിന്‍ ഹൈസിക്കെതിരായ വിജയമാണ് സ്വിസ് താരത്തെ വീണ്ടും ഒന്നാമതെത്തിച്ചത്. ഇത് നാലാം തവണയാണ് അദ്ദേഹം ഒന്നാം സ്ഥാനത്ത് എത്തുന്നത്.

14 വര്‍ഷം മുമ്പ് ആദ്യമായി ഒന്നാം സ്ഥാനത്ത് എത്തിയതിനേക്കാള്‍ പ്രത്യേകത ഇതിനുണ്ടെന്ന് അദ്ദേഹം പ്രതികരിച്ചു. 'ഒരുപാട് കഠിനാധ്വാനം ഇതിന് പിന്നലുണ്ട്. പരുക്കും അതിലൊരു കാരണമാണ്. കൈയെത്തി പിടിക്കാന്‍ പറ്റില്ലെന്ന് കരുതിയത് കൊണ്ടു തന്നെ വീണ്ടുമൊരു ഒന്നാം സ്ഥാനം കിട്ടുമെന്ന് കരുതിയതല്ല', ഫെഡറര്‍ പറഞ്ഞു.