ജാംനഗർ: ബൈക്കിൽ കാറിടിച്ചതിനെ തുടർന്ന് ഇന്ത്യൻ ക്രിക്കറ്റർ രവീന്ദ്ര ജഡേജയുടെ ഭാര്യയെ പൊലീസുകാരൻ ആക്രമിച്ചതായി പരാതി. ഗുജറാത്ത് പൊലീസിലെ കോൺസ്റ്റബിൾ സഞ്ജയ് അഹിറിനെതിരെയാണ് പരാതി.

ഇന്നലെ രാത്രിയായിരുന്നു സംഭവം. രവീന്ദ്ര ജഡേജയുടെ ഭാര്യ റിവബ ജഡേജ ഓടിച്ചിരുന്ന കാർ സഞ്ജയ് അഹിറിന്റെ ബൈക്കിൽ ഇടിക്കുകയായിരുന്നു. പിന്നാലെ കാറിൽ നിന്നിറങ്ങിയ റിവബയുടെ നേരെ സഞ്ജയ് ആക്രോശിച്ചെത്തുകയും കൈയ്യേറ്റം ചെയ്യുകയും ചെയ്തെന്നാണ് പരാതി.

ഈ സമയത്ത് റിവബയ്ക്ക് ഒപ്പം കൈക്കുഞ്ഞുമായി സുഹൃത്തായ യുവതിയും ഉണ്ടായിരുന്നു. രാത്രിയിൽ പൊതുസ്ഥലത്ത് വച്ച് സ്ത്രീയെ ആക്രമിച്ചത് ഗുരുതരമായ കുറ്റമാണെന്ന് ജാംനഗർ പൊലീസ് സൂപ്രണ്ട് പ്രദീപ് സെജുൽ പറഞ്ഞു.

സഞ്ജയ്  അഹിറിനെതിരെ വകുപ്പ് തല അന്വേഷണം നടക്കും. ഇദ്ദേഹത്തിനെതിരെ റിവബയുടെ പരാതിയിൽ എഫ് ഐ ആർ രജിസ്റ്റർ ചെയ്തു. സസ്പെൻഷൻ നൽകുമെന്നാണ് സൂപ്രണ്ട് വ്യക്തമാക്കിയിരിക്കുന്നത്.

ഐപിഎല്ലിൽ ചെന്നൈ സൂപ്പർ കിംഗ്‌സ് താരമായ രവീന്ദ്ര ജഡേജ ടീമിനൊപ്പം മുംബൈയിലാണ്. ഇന്ത്യൻ പ്രീമിയർ ലീഗിൽ ഇന്ന് വൈകിട്ട് സൺറൈസേഴ്‌സ് ഹൈദരാബാദിനെതിരെ ആദ്യ ക്വാളിഫയർ മത്സരം ഇന്ന് നടക്കും.

ഏറ്റവും പുതിയ വാർത്തകൾക്കും വിശകലനങ്ങൾക്കും ഞങ്ങളെ ഫെയ്സ്ബുക്കിലും ട്വിറ്ററിലും ലൈക്ക് ചെയ്യൂ