Kerala vs Gujarat 4th Quarter Final Live Score: രഞ്ജി ട്രോഫി ക്രിക്കറ്റിൽ ക്വാർട്ടർ ഫൈനൽ പോരാട്ടത്തിൽ ഗുജറാത്തിനും ബാറ്റിങ് തകർച്ച. കേരളം ഉയർത്തിയ 185 റൺസ് പിന്തുടരുന്ന ഗുജറാത്തിന് ഓപ്പണർമാരെ നഷ്ടമായി. ഒടുവിൽ വിവരം ലഭിക്കുമ്പോൾ ഗുജറാത്ത് രണ്ട് വിക്കറ്റ് നഷ്ടത്തിൽ 31 റൺസെടുത്തിട്ടുണ്ട്. 4 റൺസ് നേടിയ രാഹുലും, 14 റൺസുമായി നായകൻ പാർത്ഥീവ് പട്ടേലുമാണ് ക്രീസിൽ. സന്ദീപ് വാര്യരാണ് കേരളത്തിന് വേണ്ടി രണ്ട് വിക്കറ്റുകളും വീഴ്ത്തിയത്.

നേരത്തെ കേരളത്തിന്റെ ആദ്യ ഇന്നിങ്സ് 185 റൺസിന് അവസാനിക്കുകയായിരുന്നു. 37 റൺസെടുത്ത ബേസിൽ തമ്പിയാണ് കേരളത്തിന്റെ ടോപ് സ്കോറർ. വിനൂപ് 25 റൺസിനും രാഹുൽ.പി 26 റൺസിന് പുറത്തായപ്പോൾ മറ്റ് താരങ്ങൾക്കാർക്കും ബാറ്റിങ്ങിൽ തിളങ്ങാനായില്ല.

സ്കോർബോർഡ് 29 ൽ എത്തിയപ്പോഴേക്കും ഓപ്പണർ മുഹമ്മദ് അസാറുദീനെ കേരളത്തിന് നഷ്ടമായി. പ്രതീക്ഷ നൽകാതെ രാഹുൽ പുറത്തായതിന് തൊട്ടടുത്ത പന്തിൽ സിജോമോനും പുറത്തായത് കേരളത്തിന് തിരിച്ചടിയായി. അധികം വൈകാതെ റൺസൊന്നുമെടുക്കാതെ നായകൻ സച്ചിൻ ബേബിയും മടങ്ങി. പിന്നീട് കൃത്യമായ ഇടവേളകളിൽ കേരള താരങ്ങൾ കൂടാരം കയറി.

ടോസ് നേടിയ ഗുജറാത്ത് കേരളത്തെ ബാറ്റിങ്ങിനയക്കുകയായിരുന്നു. വയനാട് കൃഷ്ണഗിരി സ്റ്റേഡിയത്തിലെ തണുപ്പും മഞ്ഞുവീഴ്ചയും പേസിന് അനുകൂലമാകുമെന്നത് ഗുജറാത്ത് മുതലാക്കുകയായിരുന്നു.

Get all the Latest Malayalam News and Kerala News at Indian Express Malayalam. You can also catch all the Sports News in Malayalam by following us on Twitter and Facebook