പുതുച്ചേരി: ക്രിക്കറ്റ് ലോകത്ത് നാണക്കേടിന്റെ റെക്കോർഡ് സ്വന്തമാക്കിയിരിക്കുകയാണ് മിസോറാം വനിത ടീം. പുതുച്ചേരിയിൽ നടക്കുന്ന വനിതകളുടെ ടി20 ടൂർണമെന്റിലാണ് മിസോറാം ഒമ്പത് റൺസിന് പുറത്തായത്. 13.5 ഓവർ ബാറ്റ് ചെയ്താണ് മിസോറാം ഒമ്പത് റൺസെടുത്തത്. ഒമ്പത് മിസോറാം താരങ്ങൾ പൂജ്യത്തിന് പുറത്തായതും മറ്റൊരു ചരിത്രമായി.

അഞ്ചാമതായിറങ്ങി 25 പന്തില്‍ ഒരു ബൗണ്ടറിയടക്കം ആറ് റണ്‍സെടുത്ത അപൂര്‍വ ഭരദ്വാജ് മാത്രമാണ് മിസോറാം നിരയില്‍ ആകെ റൺസ് കണ്ടെത്തിയത്. ആറ് റൺസ് അപൂർവ നേടിയപ്പോൾ മൂന്ന് റൺസ് മധ്യപ്രദേശ് താരങ്ങൾ എക്സ്ട്ര റൺസിലൂടെ വിട്ടുനൽകിയതാണ്. ആകെ 40 ഓവറുകൾ പന്തെറിയേണ്ട മത്സരം 14.5 ഓവറിൽ അവസാനിച്ചു. വിജയലക്ഷ്യം മറികടക്കാൻ കേവലം ആറ് പന്തുകൾ മാത്രമാണ് വേണ്ടി വന്നത്.

നാല് ഓവറെറിഞ്ഞ മധ്യപ്രദേശിന്റെ താരങ് ജാ നാല് വിക്കറ്റുകൾ വീഴ്ത്തി മിസോറാം തകർച്ചയിൽ മുഖ്യ പങ്ക് വഹിച്ചു. ആകെ എറിഞ്ഞ 24 പന്തുകളിൽ 23 ഡെഡ് ബോളാക്കാനും താരത്തിന് സാധിച്ചു. രണ്ട് റൺസാണ് താരം വിട്ടുനൽകിയത്.

നേരത്തെ കേരളത്തിനെതിരെയും മിസോറാം കുറഞ്ഞ സ്കോറിന് പുറത്തായിരുന്നു. അന്ന് 24 റൺസിനാണ് മിസോറാം കേരളത്തോട് അടിയറവ് പറഞ്ഞത്. പത്ത് വിക്കറ്റിന്റെ തോൽവിയാണ് കേരളത്തിനെതിരെയും മിസോറാം വഴങ്ങിയത്. അന്താരാഷ്ട്ര ക്രിക്കറ്റിൽ യുഎഇയോട് ചൈന 14 റൺസിന് പുറത്തായതാണ് ഇത് വരെയുള്ള ഏറ്റവും ചെറിയ സ്കോർ.

Get all the Latest Malayalam News and Kerala News at Indian Express Malayalam. You can also catch all the Sports News in Malayalam by following us on Twitter and Facebook